ചൈന ഓപണ്‍: ഷറപോവ പിന്മാറി

വുഹാന്‍: അടുത്തയാഴ്ച ബെയ്ജിങ്ങില്‍ ആരംഭിക്കുന്ന ചൈന ഓപണ്‍ ടെന്നിസ് ടൂര്‍ണമെന്‍റില്‍നിന്ന് നിലവിലെ ചാമ്പ്യനായ റഷ്യന്‍ താരം മരിയ ഷറപോവ പിന്മാറി. കൈത്തണ്ടയിലെ പരിക്കാണ് കാരണം. ഇതേ കാരണത്താല്‍ വുഹാന്‍ ഓപണ്‍ മത്സരത്തിനിടെ താരം പിന്മാറിയിരുന്നു. ജൂലൈയില്‍ വിംബ്ള്‍ഡണ്‍ സെമിഫൈനലില്‍ സെറീന വില്യംസിനോട് തോറ്റതുമുതല്‍ പരിക്കിന്‍െറ പിടിയിലാണ് ലോക മൂന്നാം നമ്പര്‍ താരം. കാലിലെ പരിക്കു കാരണം യു.എസ് ഓപണ്‍ ഉള്‍പ്പെടെ മൂന്ന് ടൂര്‍ണമെന്‍റുകള്‍ നഷ്ടമായ ഷറപോവ, വുഹാനില്‍ തിരിച്ചുവരവിനൊരുങ്ങുകയായിരുന്നു. എന്നാല്‍, ആദ്യ മത്സരത്തില്‍ തന്നെ പരിക്ക് വീണ്ടും വില്ലനായി. ചൈന ഓപണിലും കളിക്കാനാകാത്തതോടെ, അടുത്ത മാസം അവസാനം നടക്കുന്ന വര്‍ഷാവസാന ടൂര്‍ണമെന്‍റായ ഡബ്ളു.ടി.എ ഫൈനല്‍സില്‍ കളിക്കാനാകുമോ എന്നതും അനിശ്ചിതത്വത്തിലാണ്.