2021ലെ ലോക പുരുഷ ബോക്​സിങ്​ ചാമ്പ്യൻഷിപ്​​ ഇന്ത്യയിൽ നിന്നും സെർബിയയിലേക്ക്​ മാറ്റി

ന്യൂഡൽഹി: 2021ൽ ന്യൂഡൽഹിയിൽ നടക്കേണ്ടിയിരുന്ന ലോക പുരുഷ ബോക്​സിങ്​ ചാമ്പ്യൻഷിപ്പിൻെറ ആതിഥേയത്വം ഇന്ത്യ​ക്ക ്​ നഷ്​ടമായി. ആതിഥേയത്വ ഫീ നൽകിയില്ലെന്ന്​ കാണിച്ചാണ്​ അന്താരാഷ്​ട്ര ബോക്​​സിങ്​ അസോസിയേഷൻ ചാമ്പ്യൻഷിപ്​ ​ ഇന്ത്യയിൽ നിന്നും സെർബിയൻ നഗരമായ ബെൽഗ്രേഡിലേക്ക്​ മാറ്റിയത്​. എന്നാൽ തങ്ങളോട്​ ആ​േലാചിക്കാതെ അസോസിയേഷൻ ഏ കപക്ഷീയമായാണ്​ നടപടിയെടുത്തതെന്ന്​ ബോക്​സിങ്​ ഫെഡറേഷൻ ഓഫ്​ ഇന്ത്യ (ബി.എഫ്​.ഐ) പ്രതികരിച്ചു.

കഴിഞ്ഞ വർഷം ഡിസംബർ രണ്ടിന്​ മുമ്പ്​ ആതിഥേയത്വ ഫീസായ 40 ലക്ഷം ഡോളർ ഇന്ത്യ നൽകേണ്ടിയിരുന്നു. എന്നാൽ സാ​ങ്കേതിക തടസങ്ങളെത്തുടർന്ന്​ ബോക്​സിങ്​ ഫെഡറേഷന്​ ഫീസടക്കാനായില്ല. ആതിഥേയത്വം റദ്ദാക്കിയ സാഹചര്യത്തില്‍ റദ്ദാക്കല്‍ പിഴയായി 500 ഡോളർ അടക്കാൻ ഇന്ത്യയോട്​ ആവശ്യപ്പെട്ടിട്ടുണ്ട്​.

സാമ്പത്തിക ക്രമക്കേടിനെത്തുടർന്ന് അന്താരാഷ്​ട്ര ബോക്​സിങ്​​ ഫെഡറേഷനെ രാജ്യാന്തര ഒളിംപിക് കമ്മിറ്റി (ഐ.ഒ.സി) നേരത്തെ സസ്പെന്‍ഡ് ചെയ്​തിരുന്നു. ഇതേത്തുടർന്ന്​ ഫെഡറേഷൻെറ ലോസന്നയിലെ അക്കൗണ്ടുകള്‍ മരവിപ്പിക്കുകയും ചെയ്തു. അതോടെ ഫെഡറേഷൻെറ സെർബിയയിലെ അക്കൗണ്ട്​ വഴി ഇടപാട്​ നടത്താൻ തുടങ്ങി. ഫിനാൻഷ്യൽ ആക്ഷൻ ടാസ്​ക്​ ഫോഴ്​സിൻെറ ഗ്രേ പട്ടികയിൽ പെട്ട രാജ്യമായതിനാൽ സെർബിയയിലേക്ക്​ പണമയക്കാൻ ഇന്ത്യൻ ബാങ്കുകൾ വിസമ്മതിച്ചിരുന്നു. ഇതോടെയാണ്​ ആതിഥേയത്വ ഫീസ് നല്‍കാന്‍ നിർവാഹമില്ലാതായത്​. പിഴ വിധിച്ച നടപടി ഞെട്ടിക്കുന്നതാ​െണന്ന്​ ബി.എഫ്​.ഐ പ്രസ്​താവനയിൽ അറിയിച്ചു.

2017ലാണ് ചാമ്പ്യന്‍ഷിപ്പിന് ആദ്യമായി വേദിയാവാൻ ഇന്ത്യക്ക്​ നറുക്ക്​ വീണത്​.