കളി നന്നായിട്ടും ഗോള്‍ വന്നില്ല –ശ്രീജേഷ്

റിയോ ഡെ ജനീറോ: നന്നായി കളിച്ചെങ്കിലും അവസാനം ലഭിച്ച അവസരങ്ങള്‍ ഗോളാക്കുന്നതിലെ വീഴ്ച തോല്‍വിക്ക് കാരണമായെന്ന് ഇന്ത്യന്‍ ക്യാപ്റ്റന്‍ ശ്രീജേഷ്. സമനില ഗോളടിച്ച ശേഷം അതില്‍ പിടിച്ചു നില്‍ക്കാനായി പ്രതിരോധത്തിനാണ് ഊന്നല്‍ നല്‍കിയത്. എന്നാല്‍ ഡച്ച് ടീം ആക്രമണം കനപ്പിച്ചു. അതോടെ സമ്മര്‍ദത്തിലുമായി. ഗോള്‍ വഴങ്ങേണ്ടിയും വന്നു. പിന്നീട് നമ്മള്‍ ആക്രമണത്തിലേക്ക് മാറിയപ്പോള്‍ അവര്‍ കനത്ത പ്രതിരോധം തീര്‍ത്തു.
അവസാന നിമിഷം തുടര്‍ച്ചയായി അഞ്ചു പെനാല്‍ട്ടി കോര്‍ണറുകള്‍ ലഭിച്ചത് മുതലാക്കാനായില്ല. ഏതായാലും ശക്തരായ ജര്‍മ്മനിയോടും നെതര്‍ലാന്‍റ്സിനോടും അവസാനം വരെ വീറോടെ പൊരുതാനായി. വെള്ളിയാഴ്ച കാനഡക്കെതിരായ മത്സരത്തിലാണ് ശ്രദ്ധ.