സ്​പെയിനും പാനമയും അങ്കത്തട്ടിൽ

മോസ്​കോ: മുൻ ലോക ചാമ്പ്യന്മാരായ സ്​പെയിനും അരങ്ങേറ്റക്കാരായ പാനമയും ലോകകപ്പ്​ പോരാട്ടങ്ങൾക്കായി റഷ്യയിലെത്തി. ദക്ഷിണ റഷ്യൻ നഗരമായ ക്രാസ്​നോദറിലെത്തിയ സ്​പാനിഷ്​ ടീമിനെ വരവേൽക്കാൻ ആരാധകർ വിമാനത്താവളത്തിന്​ മുന്നിൽ തടിച്ചുകൂടിയിരുന്നു.

മേയർ യെവ്​ഗനി പെർവിശോവില​​െൻറ നേതൃത്വത്തിൽ നാടൻപാട്ടുകളുടെ അകമ്പടിയോടെ പരമ്പരാഗത രീതിയിലാണ്​ റഷ്യ അതിഥികളെ വരവേറ്റത്​. ശനിയാഴ്​ച തുനീഷ്യക്കെതിരെയാണ്​ സ്​പാനിഷ്​ ടീമി​​െൻറ അവസാന സൗഹൃദ മത്സരം. പോർചുഗൽ, ഇറാൻ, മൊറോക്കോ എന്നിവരോടൊപ്പം ഗ്രൂപ്​​ ബിയിലാണ്​ സ്​പെയിനി​​െൻറ സ്​ഥാനം. 

ശക്​തരായ യു.എസിനെയും ഹോണ്ടുറസിനെയും പിന്തള്ളി കോൺകകാഫ്​ മേഖലയിൽനിന്നും യോഗ്യത നേടിയ പാനമ വോൾഗ ഏരിയ സിറ്റിയിൽ വിമാനമിറങ്ങി. ടീമിനായി നഗരത്തിലെ ഒളിമ്പിക്​ ​ട്രെയിനിങ്​ സ​െൻററിലാണ്​ താമസസൗകര്യം ഒരുക്കിയിരിക്കുന്നത്​. കഴിഞ്ഞദിവസം നോർവേക്കെതിരെ നടന്ന സന്നാഹ മത്സരത്തില്‍ എതിരില്ലാത്ത ഒരു ഗോളിന്​ പാനമ പരാജയപ്പെട്ടിരുന്നു.

ഇംഗ്ലണ്ട്​, ബെൽജിയം, തുനീഷ്യ എന്നിവർക്കൊപ്പം ഗ്രൂപ്​​ ജിയിലാണ്​ പാനമ. 18ന് ബെല്‍ജിയത്തെയാണ് പാനമക്ക്​ തങ്ങളുടെ ആദ്യ ലോകകപ്പ്​ മത്സരത്തിൽ നേരിടാനുള്ളത്​. ​ഏഷ്യൻ വമ്പന്മാരായ ഇറാനാണ്​ ആദ്യം റഷ്യയിലെത്തിയത്​.