ഫ്രഞ്ച്​ ക്ലാസിക്കിൽ പി.എസ്​.ജി; മോണകോയെ 2-1ന്​ തോൽപിച്ചു

പാരിസ്​: ഫ്രഞ്ച്​ ലീഗിലെ ക്ലാസിക്​ പോരിൽ ജയം പി.എസ്​.ജിക്കൊപ്പം. നിലവിലെ ചാമ്പ്യന്മാരായ മോണകോയെ 2^1ന്​ തോൽപിച്ച്​ നെയ്​മറും സംഘവും ​ലീഗ്​ വണ്ണിൽ ജൈത്രയാത്ര തുടരുന്നു. ആവേശം നിറഞ്ഞ പോരിൽ നിറഞ്ഞുകളിച്ചത്​ പി.എസ്​.ജി തന്നെ. മത്സരത്തിൽ 67 ശതമാനവും പന്ത്​ കൈവശം. തുടക്കം മുതലെ ആക്രമണം കനപ്പിച്ച പി.എസ്​.ജിക്ക്​ 19ാം മിനിറ്റിൽ ഗോളെത്തി.

ജൂലിയൻ ഡ്രാക്​സിലറുടെ മികച്ച ക്രോസിൽ എഡിസൻ കവാനിയാണ്​ വലകുലുക്കിയത്​. അവസരങ്ങ​ൾ പെരുമഴയായി പി.എസ്​.ജിക്ക്​ എത്തിയെങ്കിലും രണ്ടാം ഗോൾ വരുന്നത്​ 52ാം മിനിറ്റിൽ. നെയ്​മറിനെ ബോക്​സിൽ വീഴ്​ത്തിയതിന്​ പെനാൽറ്റി. നെയ്​മർ തന്നെ കിക്കെടുത്ത്​ ഗോളാക്കി. 81ാം മിനിറ്റിൽ മോണകോ ഗോൾനേടി തിരിച്ചുവരവിന്​ ശ്രമം നടത്തിയെങ്കിലും ഫലമുണ്ടായില്ല.