സിറ്റി കുരുങ്ങി; ലിവർപൂൾ മുന്നോട്ട്​

ലണ്ടൻ: 77 മിനിറ്റും പന്ത്​ കൈവശം വെക്കുകയും അവസരങ്ങളിലേറെയും സൃഷ്​ടിക്കുകയും ചെയ്​തിട്ടും പെപ്​ ഗാർഡിയോളയു ടെ സംഘത്തിന്​ ന്യൂകാസിലി​നെതിരെ സമനിലയുടെ നിർഭാഗ്യം. കൊണ്ടും കൊടുത്തും ലീഡ്​ ഇരുവശങ്ങളിലേക്കും മാറിമറിഞ് ഞ മത്സരത്തിൽ ഇരുടീമുകളും രണ്ടു ഗോളുകൾ വീതമടിച്ചാണ്​ പോയൻറ്​ പങ്കിട്ടത്​. ഇതോടെ, ഒന്നാമതുള്ള ലിവർപൂളുമായി പോയൻറ്​ അകലം പിന്നെയും കൂടി ചാമ്പ്യൻപോരാട്ടത്തിൽനിന്ന്​ സിറ്റി ഏറെ​ക്കുറെ പുറത്താവുമെന്നായി.

22ാം മിനിറ്റിൽ റഹീം സ്​റ്റെർലിങ്ങാണ്​ സ്​കോറിങ്ങിന്​ തുടക്കമിട്ടത്​. എതിർപോസ്​റ്റിലെ കൂട്ടപ്പൊരിച്ചിലിനിടെ സിൽവ നീട്ടിനൽകിയ പന്ത്​ അനായാസം പോസ്​റ്റി​​െൻറ വലതുമൂലയിലേക്ക്​ അടിച്ചുകയറ്റുകയായിരുന്നു. ലീഡി​​െൻറ ആത്മവിശ്വാസവുമായി ഓടിനടന്ന സിറ്റി നിരയെ മിനിറ്റുകൾക്കകം അതിനേക്കാൾ മനോഹരമായി തിരിച്ചടിച്ച്​​ ന്യൂകാസിൽ ഒപ്പം പിടിച്ചു. വില്യംസാണ്​ സ്​കോർ ചെയ്​തത്​.

സമനില​ക്കുരുക്കഴിക്കാൻ ആഞ്ഞുകളിച്ച സിറ്റിക്ക്​ 82ാം മിനിറ്റുവരെ കാത്തിരിക്കേണ്ടിവന്നു. ന്യൂകാസിൽ താരം ക്ലിയർ ചെയ്​ത ഹെഡർ നെഞ്ചിൽ സ്വീകരിച്ച ഡി ബ്രൂയിൻ നിലത്തിറക്കി തകർപ്പൻ വോളിയിലൂടെ ലക്ഷ്യം കണ്ടു. ജയവും മൂന്നു പോയൻറുമുറപ്പിച്ച സിറ്റിയുടെ നെഞ്ചകം പിളർന്ന്​ അഞ്ചുമിനിറ്റ്​ കഴിഞ്ഞ്​ ന്യൂകാസിൽ പിന്നെയും ഒപ്പം പിടിച്ചു. പോസ്​റ്റിന്​ 25 വാര അകലെനിന്നു ലഭിച്ച ​​ഫ്രീകിക്ക്​ പ്രതിരോധക്കോ​ട്ടയെ കബളിപ്പിച്ച്​ മാറിനിന്ന ഷെൽവി സിറ്റി പോസ്​റ്റിൽ​ സമർഥമായി ഗോളാക്കുകയായിരുന്നു.

മറ്റൊരു മൽസരത്തിൽ പോയിൻറ്​ നിലയിൽ ഒന്നാമതുള്ള ലിവർപൂൾ ബ്രൈറ്റണെ 2-1ന്​ തോൽപിച്ചു. ബോക്​സിനു പുറത്ത്​ പന്തുതൊട്ട്​ ചുവപ്പുകാർഡുവാങ്ങി അലിസൺ ബക്കർ പുറത്തുപോയ മൽസരത്തിൽ വിർജിൽ വാൻഡൈക്കാണ്​ രണ്ടു വട്ടം ഹെഡറിൽ ടീമിനെ മുന്നിലെത്തിച്ചത്​.

കരുത്തരായ ​ചെൽസിയെ ഒരു ഗോളിന്​ മറികടന്ന്​ വെസ്​റ്റ്​ഹാമും ബേൺമൗത്തിനെ 3-2 ന്​ വീഴ്​ത്തി ടോട്ടൻഹാമും വിജയം കുറിച്ചു. ബേൺ​ലിയെ ഏകപക്ഷീയമായ രണ്ടു ഗോളിന്​ ക്രിസ്​റ്റൽ പാലസ്​ വീഴ്​ത്തി.