ക്ലാസിക്​ പോരിൽ മാഞ്ചസ്റ്റർ സിറ്റിയെ വീഴ്​ത്തി ലിവർപൂൾ

00:48 AM
11/11/2019
liverpool-1011119.jpg

ലണ്ടൻ: ഇംഗ്ലണ്ടിൽ കിരീടത്തിലേക്ക്​ ലീഡ്​ പിടിച്ച്​ ലിവർപൂളി​​െൻറ കുതിപ്പ്​. പ്രീമിയർ ലീഗിലെ സൂപ്പർ ക്ലാസികോ ആയി വിശേഷിപ്പിച്ച മത്സരത്തിൽ നിലവിലെ ജേതാക്കളായ മാഞ്ചസ്​റ്റർ സിറ്റിയെ 3-1ന്​ കീഴടക്കി ലിവർപൂൾ ബഹുദൂരം മുന്നിൽ. കളിയുടെ സമസ്​ത മേഖലയിലും പെപ്​ ഗ്വാർഡിയോളയുടെ സിറ്റിയെ വരിഞ്ഞുകെട്ടിയാണ്​ യൂറോപ്യൻ ചാമ്പ്യന്മാർ ഒന്നാം നമ്പറുകാർക്കൊത്ത പ്രകടനം പുറത്തെടുത്തത്​. 

കളിയുടെ ആറാം മിനിറ്റിൽ ഫാബിന്യോയുടെ ലോങ്​ റേഞ്ചർ ഗോളിലൂടെയായിരുന്നു തുടക്കം. പിന്നാലെ, മുഹമ്മദ്​ സലാഹും (13), സാദിയോ മാനെയും (51) ചേർന്ന്​ ലിവർപൂളിനെ 3-0ത്തിലെത്തിച്ചു. 78ാം മിനിറ്റിൽ ബെർണാഡോ സിൽവയുടെ ഗോളിൽ തിരിച്ചടിച്ച സിറ്റി അവസാന മിനിറ്റുകളിൽ പൊരുതി നോക്കിയെങ്കിലും ഡിജാൻ ലൊവ്​റനും വാൻഡൈകും ഒരുക്കിയ പ്രതിരോധകോട്ട പൊളിക്കാനായില്ല.

സലാഹ്​-മാനെ-ഫെർമീന്യോ കൂട്ടിലൂടെ ആക്രമണത്തിന്​ മൂർച്ചകൂട്ടിയ ​േക്ലാപ്പി​​െൻറ തന്ത്രങ്ങൾക്കായിരുന്നു ആൻഫീൽഡിൽ ജയം. 
അഗ്യൂറോ-ഡിബ്രുയിൻ -സ്​റ്റർലിങ്​ സമവാക്യത്തിലൂടെ പെപ്​ മറുതന്ത്രം മെനഞ്ഞെങ്കിലും ഫലംകണ്ടില്ല. സീസണിൽ തോൽവിയറിയാതെ കുതിക്കുന്ന ലിവർപൂൾ 12 കളിയിൽ 34 പോയൻറ്​ സ്വന്തമാക്കി. ലെസ്​റ്റർ സിറ്റിയും ചെൽസിയുമാണ്​ (26) രണ്ടും മൂന്നും സ്​ഥാനത്ത്​. മൂന്നാം തോൽവി വഴങ്ങിയ മാഞ്ചസ്​റ്റർ സിറ്റി (25) നാലാമതാണ്​. 

യുനൈറ്റഡിനും ലെസ്​റ്ററിനും ജയം
കഴിഞ്ഞ കളിയിൽ ബേൺമൗത്തിനോട്​ തോറ്റ യുനൈറ്റഡ്​, ബ്രൈറ്റൺ ആൽബിയോണിനെ 3-1ന്​ തോൽപിച്ചു. ആന്ദ്രെ പെരേര (17), മാർകസ്​ റാഷ്​ഫോഡ്​ (66) എന്നിവർക്കൊപ്പം ഒരു സെൽഫ്​ ഗോൾകൂടി യുനൈറ്റഡിന്​ അനുകൂലമായി പിറന്നു. ജയത്തോടെ 16 പോയൻറുമായി യുനൈറ്റഡ്​ ഏഴാം സ്​ഥാനത്തേക്കു​ കയറി.  

ശനിയാഴ്​ച നടന്ന മത്സരത്തിൽ ലെസ്​റ്റർ സിറ്റി 2-0ത്തിന്​ ആഴ്​സനലിനെ തോൽപിച്ചു. ജാമി വാർഡിയും (68) ജെയിംസ്​ മാഡിസണുമാണ്​ (75) ഗോൾ നേടിയത്​. ഷെഫീൽഡ്​ യുനൈറ്റഡുമായി 1-1ന്​ സമനിലയിൽ കുരുങ്ങിയ ടോട്ടൻഹാം ഹോട്​സ്​പർ (14 പോയൻറ്​) 14ാം സ്​ഥാനത്തേക്കു​ താഴ്​ന്നു.

Loading...
COMMENTS