ഗോവയെ മുട്ടുകുത്തിച്ച്​ പുണെ

മഡ്​ഗാവ്​: എഫ്​.സി ഗോവയും സ്വന്തം തട്ടകത്തിൽ തോൽവി ഏറ്റുവാങ്ങി. ഹോം ഗ്രൗണ്ടിൽ മൂന്നാം ജയവും പ്രതീക്ഷിച്ചിറങ്ങിയ ഗോവയെ പുണെയാണ്​ 2-0ത്തിന്​ തകർത്തുവിട്ടത്​. എമിലിയാനോ അൽഫാരോ, ജോനാഥൻ ലൂക്ക എന്നിവരാണ്​ ഗോവയെ സ്വന്തം കാണികളുടെ മുന്നിൽ നാണംകെടുത്തിയത്​. പോയൻറ്​ പട്ടികയിൽ ഒന്നാം സ്​ഥാനം ലക്ഷ്യമിട്ടായിരുന്നു തുടർ ജയങ്ങളുമായി മുന്നേറിയ ഗോവ ഫറ്റോർഡ ​സ്​റ്റേഡിയത്തിലിറങ്ങിയത്​.  

4-2-3-1 ശൈലിയിലാണ്​ ഗോവ കോച്ച്​ സെർജിയോ ലൊബോറ കടുത്ത എതിരാളികൾക്കെതിരെ തന്ത്രമൊരുക്കിയത്​. ആദ്യ പകുതിയിൽ ആധിപത്യം പുലർത്തി ഗോവ മുന്നിട്ടുനിന്നെങ്കിലും രണ്ടാം പകുതി പാളി. മലയാളി താരം ആഷിഖ്​ കുരുണിയനിനെയും ഡീഗോ കാർലോസിനെയും പിൻവലിച്ച്​ ജോനാഥൻ ലൂക്ക, രാജ ഷെയ്​ഖ്​ എന്നിവരെ കളത്തിലിറക്കിയ​ത്​​ മത്സരത്തിൽ നിർണായകമായി​. 

71ാം മിനിറ്റിൽ എമിലിയാനോ അൽഫാരോയാണ്​ ഗോവ​യുടെ വല ആദ്യം കുലുക്കിയത്​. അവസരം ഒരുക്കിയത്​ ​െഎ.എസ്​.എല്ലിലെ സൂപ്പർ താരം മാർസലീന്യോയും. പിന്നാലെ, പകരക്കാരനായി എത്തിയ ജോനാഥൻ ലൂക്കയും (89) ഗോവയുടെ വലയിൽ പന്തെത്തിച്ചു. ഇതോടെ ആതിഥേയർ തോൽവി സമ്മതിച്ചു. ആറു മത്സരത്തിൽ 12 പോയൻറുമായി ഗോവ രണ്ടാമതും ഏഴു മത്സരങ്ങളിൽ ഇത്രയും പോയൻറുള്ള പുണെ നാലാമതുമാണ്​.