ഏഷ്യൻ ചാമ്പ്യൻ ഖത്തറിനെ ഗോൾരഹിത സമനിലയിൽ തളച്ച്​ ഇന്ത്യ

00:22 AM
11/09/2019

ദോഹ: ലോകകപ്പ്​ ഫുട്​ബാൾ യോഗ്യതാ റൗണ്ടിലെ വീറുറ്റ പോരാട്ടത്തിൽ നാട്ടുകാർക്ക്​ മുന്നിലിറങ്ങിയ ഖത്തറിനെ ഗോളില്ലാ സമനിലയിൽ തളച്ച്​ ഇന്ത്യൻ വീരഗാഥ. നായകൻ സുനിൽ ഛേത്രിയും, ഒമാനെതിരെ ഉഗ്രനീക്കങ്ങളുമായി പടനയിച്ച ആഷിഖ്​ കുരുണിയനുമില്ലാതെയാണ് ഇന്ത്യ ഇറങ്ങിയത്​. മറുനിരയിൽ ഏഷ്യാ കപ്പിൽ ഗോളടിച്ചു കൂട്ടിയ അൽമോസ്​ അലിയും നായകൻ ഹസൻ ഹൈദോസും നയിച്ച ഖത്തറും.

ആദ്യ മിനിറ്റ്​ മുതൽ തലങ്ങും വിലങ്ങും ആക്രമിച്ച ഖത്തറിന്​ മുന്നിൽ അക്രോബാറ്റിക്​ സേവും ഒറ്റക്കൈയിലെ ചെറുത്തുനിൽപുമായി ഗുർപ്രീത്​ ഇന്ത്യയുടെ വൻമതിലായി. 90 മിനിറ്റ്​ പോരാട്ടം അവസാനിക്കു​േമ്പാഴേക്കും 27 ഷോട്ടുകളാണ്​ ഗോളി രക്ഷപ്പെടുത്തിയത്​. അവയിൽ ചിലത്​ ക്രോസ്​ ബാറിൽ തട്ടിയും അകന്നു.

അതേസമയം, ആദ്യ പകുതിയിൽ ഇന്ത്യൻ മുൻ നിരയിൽ മലയാളി താരം സഹൽ അബ്​ദുൽ സമദിനും ഉദാന്തക്കുമൊന്നും പന്ത്​ പോലും ലഭിച്ചിരുന്നില്ല. രണ്ടാം പകുതിയിൽ കൗണ്ടർ ആ​ക്രമണത്തിന്​ അവസരമൊരുങ്ങി പന്ത്​ ലഭിച്ചപ്പോഴാവ​െട്ട, ഖത്തറി​​​െൻറ ബ്രസീൽ വംശജനായ ഡിഫൻഡർ റോറോ എന്ന പെഡ്രോ മ​ിഗ്വേൽ വളഞ്ഞിട്ടു പിടിച്ചു. ഇടക്ക്​ സഹലി​​​െൻറ ഒരു ഷോട്ട്​ ഗോൾ പോസ്​റ്റിന്​ മുകളിലായ്​ പറഞ്ഞു. ഉദാന്തയുടെ മറ്റൊരു ലോങ്​ റേഞ്ചർ ഗോളി സാദ്​ അൽഷീബി​​​െൻറ കൈകളിലും അവസാനിച്ചു.

രണ്ടാം പകുതിയിൽ നിഖിലിന്​ പകരം ബ്രണ്ടൻ ഫെർണാണ്ടസും സഹലിന്​ പകരം വിനീത്​ റായും എത്തി. അവസാന 10 മിനിറ്റ്​ ഖത്തറി​​​െൻറ പത്ത്​ പേരും ഇന്ത്യൻ ബോക്​സിലെത്തിയിട്ടും ഗുർപ്രീതിനെ കീഴടക്കാനായില്ല. ഇഞ്ചുറി ടൈമിൽ അനിരുദ്ധ്​ ഥാപ്പക്ക്​ പകരം നരേന്ദ്ര ഗെഹ്​ലോട്ടിറങ്ങി പ്രതിരോധത്തിന്​ കരുത്ത്​ കൂട്ടി.

ആദ്യമത്സരത്തിൽ ഒമാനെതിരെ തോറ്റ ഇന്ത്യക്ക്​ ഒക്​ടോബർ 15ന്​ ബംഗ്ലാദേശിനെതിരെയാണ്​ മൂന്നാം അങ്കം.
 

Loading...
COMMENTS