ഐലീഗ്​: റിയൽ കശ്​മീരിന്​ സമനില

ഇംഫാൽ: മാസൺ റോബർട്​സണി​​െൻറ ഇരട്ടഗോളുകൾ തുണക്കെത്തിയപ്പോൾ ഐ ലീഗ്​ ഫുട്​ബാളിൽ മണിപ്പൂരി ക്ലബായ ടിഡിം റോഡ്​ അത്​ലറ്റിക്​ യൂനിയന്​ (ട്രാവു) എതിരെ റിയൽ കശ്​മീരിന്​ ആവേശകരമായ സമനില. മാസണിലൂടെ 27ാം മിനിറ്റിൽ മുന്നിലെത്തിയ കശ്​മീരുകാർക്കെതിരെ 73ാം മിനിറ്റിൽ പ്രിൻസ്​വെൽ എമേക്കയ​ും 83ാം മിനിറ്റിൽ 25 വാര അകലെനിന്നുള്ള ഫ്രീകിക്കിൽനിന്ന്​ പാട്രിക്​ ഉച്ചേയുമാണ്​ ആതിഥേയർക്കുവേണ്ടി വല കുലുക്കിയത്​.

വിജയം പ്രതീക്ഷിച്ച ട്രാവുവിനെതിരെ അടുത്ത മിനിറ്റിൽ ഡാനിഷ്​ ഫാറൂഖി​​െൻറ ക്രോസിൽ ലക്ഷ്യത്തിലേക്ക്​ തകർപ്പൻ ഹെഡറുതിർത്ത്​ മാസൺ കശ്​മീരുകാർക്ക്​ ഒരുപോയൻറ്​ നേടിക്കൊടുക്കുകയായിരുന്നു. രണ്ടു പോയൻറുമായി റിയൽ കശ്​മീർ ഒമ്പതാമതും ഒരു പോയൻറുള്ള ട്രാവു പത്താമതുമാണ്​.