കളി ഹൈടെക് ആകുമ്പോൾ

ചൈനയിൽ രൂപംകൊണ്ട കാൽപന്തുകളി ഫുട്ബാളായി പരിണാമം പ്രാപിച്ചത് ഇംഗ്ലീഷുകാർ കളിക്കാൻ തുടങ്ങിയപ്പോഴായിരുന്നു.സ്ഥലകാലങ്ങൾക്കുമപ്പുറമായി ഭൂമിയിലെ സുന്ദര കായിക വിനോദമായി മാറാനുള്ള കാരണം അതി​​​െൻറ ലാളിത്യമായിരുന്നു. നിയമങ്ങളും ചട്ടങ്ങളുമൊക്കെ രൂപപ്പെടുംമുമ്പ്​ ഒരു പന്തുണ്ടായിരുന്നെങ്കിൽ എവിടെയും ഏതു നേരത്തും അത് കളിക്കാമായിരുന്നു. കൊയ്ത്തുകഴിഞ്ഞ വയലുകളും ബ്രസീലിലെ തെരുവോരങ്ങളും അറേബ്യയിലെ മണലാരണ്യവും കളിക്കളമായി മാറി. കാലം മാറിയപ്പോൾ വ്യവസ്ഥാപിത നിയമങ്ങളായി. ഒരു ഗോൾ പോസ്​റ്റും ഇരു ടീമുകളിലും 11 പേരും അത്  നിയന്ത്രിക്കാൻ ഒരു റഫറിയും വിസിലും മതിയെന്ന അവസ്ഥയുണ്ടായി. പരിണാമം അവിടെ അവസാനിക്കുന്നില്ല. വൻകിട സ്​റ്റേഡിയങ്ങളായി, ഒരു റഫറി മൂന്നും അഞ്ചുമായി. 

യന്ത്രവത്​കരണം
സബ്​സ്​റ്റിറ്റ്യൂഷൻ ബോർഡിലൂടെയായിരുന്നു ആദ്യ യന്ത്രവത്​കരണം. തൊണ്ണൂറുകളിലെ ആ പുതുമയോടെ ഫുട്ബാളി​​​െൻറ പരിഷ്‌കാരം ഏതാണ്ട് പൂർത്തിയായെന്ന് കരുതിയപ്പോഴാണ്​ പന്തുകളുടെ പരിണാമം. കാറ്റ് നിറച്ച ബ്ലാഡർ തള്ളിക്കയറ്റി കുത്തിക്കെട്ടി കളിച്ചിരുന്ന രീതി മാറി റെഡിമെയ്​ഡ് ബാളുകളും ഹൈടെക് ബാളുകളും നിലവിൽവന്നു. ഒടുവിൽ കാമറയും ചിപ്പും ഘടിപ്പിച്ച പന്തുകൾ വരെ ആധുനിക ഫുട്ബാളി​​​െൻറ ഭാഗമായി.

ചിപ്​ ഘടിപ്പിച്ച ബ്രസൂക്ക 2014 ലോകകപ്പിനെ ഹൈടെക് ആക്കിയതിനുള്ള കാരണം 1966ലെ ഇംഗ്ലണ്ട് ലോകകപ്പു മുതൽ ഫുട്ബാൾ ഫലങ്ങളെ സംശയത്തി​​​െൻറ നിഴലിൽ നിർത്തിയിരുന്ന വരകടക്കാത്ത ഫാൻറം ഗോളുകളായിരുന്നു.ആതിഥേയരായ ഇംഗ്ലണ്ടും അവരെ നിഴൽപോലെ പിന്തുടരുന്ന ജർമനിയും തമ്മിലെ കലാശപ്പോരാട്ടത്തിൽ ജെഫ് ഹർസ്‌റ്റി​​​െൻറ ഗോൾ വര കടന്നില്ലെന്നും അത് ഗോളായിരുന്നില്ലെന്നും ജർമനിയും ഒരു കൂട്ടരും ഇന്നും വിശ്വസിക്കുന്നു. അത്തരം ഒരു അസ്വസ്ഥത ഫുട്ബാളിന് ഇനി ഉണ്ടാകരുതെന്നു കരുതി നടത്തിയ പരീക്ഷണങ്ങളാണ് 2014ൽ സഫലമായ ഗോൾലൈൻ ടെക്​നിക്. അതിനായി ഒമ്പത്​ സൂപ്പർ ഹൈസ്പീഡ് കാമറകളും ബ്രസൂക്ക പന്തിൽ ചിപ്പും ഘടിപ്പിച്ചു. അതൊരു വൻ വിജയമായി. ഹോണ്ടുറസിന് എതിരെയുള്ള മത്സരത്തിൽ ഫ്രാൻസി​​​െൻറ കരീം ബെൻസേമയുടെ ഹെഡർ ആയിരത്തിൽ ഒരു സെക്കൻഡിലാണ് ഗോൾ വരകടന്നത്​. അത് അന്നത്തെ ഗോൾലൈൻ ടെക്​നിക്​ കാമറകൾ ഒപ്പിയെടുത്തപ്പോൾ ബെൻസേമയും ഗോൾ ലൈൻ ടെക്​നിക്കും ലോക ഫുട്ബാൾ ചരിത്രത്തി​​​െൻറ ഭാഗമായി.തുടർന്നും ഫുട്ബാൾ ഫലങ്ങൾ സംശയത്തിനും അപ്പുറമാക്കാനുള്ള പരീക്ഷണങ്ങൾ ആവർത്തിച്ചു. ഒടുവിൽ  ഈ ലോകകപ്പിന് മുന്നോടിയായി വിവിധ രാജ്യാന്തര ലീഗ് മത്സരങ്ങളിൽ പരീക്ഷിച്ചു വിജയമെന്ന് കണ്ടെത്തിയ ‘വാർ’ എന്ന വിഡിയോ അസിസ്​റ്റ്​ റഫറി സിസ്​റ്റം കാര്യക്ഷമമായി റഷ്യൻ ലോകകപ്പിൽ അവതരിപ്പിക്കുന്നു.

എന്താണ് ‘വാർ’
ക്രിക്കറ്റിലും ഹോക്കിയിലും പരീക്ഷിച്ചു വിജയിച്ചതാണ് വിഡിയോ അനാലിസിസ് സംവിധാനം. എന്നാൽ, ഇത് കളിയുടെ രസച്ചരട് പൊട്ടിക്കുമോ എന്ന സന്ദേഹം കാരണം ഇതുവരെ ഫുട്ബാളിൽനിന്ന് മാറ്റിനിർത്തപ്പെടുകയായിരുന്നു. ആവർത്തിക്കുന്ന റഫറിയിങ്​ പിഴവുകൾ കണക്കിലെടുത്ത്​ കുറേക്കൂടി മെച്ചപ്പെട്ട വിഡിയോ അനാലിസിസ് സംവിധാനം നടപ്പാക്കാൻ ഫിഫ തീരുമാനിച്ചു. 

റഷ്യയിൽ മൂന്നു ടെക്​നോളജി
● വാർ (വിഡിയോ അനാലിസിസ് 
    റഫറി സിസ്​റ്റം)
●    ഗോൾ ലൈൻ ടെക്​നോളജി
●    ഇലക്​ട്രോണിക്​ പെർഫോമൻസ്​ 
    ട്രാക്കിങ്​ സിസ്​റ്റം

‘വാർ’ 
കാമറയിൽ പതിയുന്ന ദൃശ്യങ്ങൾക്കനുസരിച്ചു തരംഗങ്ങൾ റഫറിയുടെ കൈയിലെ ആം ബാൻഡ് പോലുള്ള ഉപകരണത്തിലും സൈഡ് റഫറിമാരുടെ കൊടിക്കമ്പിലും വന്നു പതിക്കും. ഒന്നാമത്തെ രീതിയിലെ സന്ദേശം അനുസരിച്ചു റഫറിക്ക് നടപടി സ്വീകരിക്കാം.

ഗോൾ പോസ്​റ്റിനു സമീപത്തെ കണ്ണിൽ പതിയാത്ത സ്ഥിരം ഫൗളുകൾ. പെനാൽറ്റിക്ക് വഴിവെക്കുന്ന ഇത്തരം ഫൗളുകൾ അപ്പീലിനു ശേഷമാകും പരിഗണിക്കപ്പെടുക. മത്സരം നിർത്തി​െവച്ച് റഫറിക്ക് നേരിട്ടു വിഡിയോ ചിത്രങ്ങൾ പരിശോധിച്ചശേഷം തീരുമാനങ്ങളെടുക്കാം. 

സംശയ സാഹചര്യങ്ങളിൽ റഫറിയോട്​ അപ്പീൽ ചെയ്യാൻ കളിക്കാർക്കും അവകാശമുണ്ട്​. ആ അവസരങ്ങളിലും റഫറിക്ക് വിഡിയോ നോക്കി തീരുമാനമെടുക്കാം. 
വാച്ചിൽ ഗോൾ തെളിയും

പരിഷ്​കരിക്കപ്പെട്ട ഗോൾ ലൈൻ ടെക്​നോളജി പ്രകാരം പന്ത് വരകടന്നാൽ ഉടൻ റഫറിയുടെ കൈയിലെ വാച്ചിൽ ‘ഗോൾ’ എന്ന് തെളിയും. 

മികവളക്കാൻ ഇ.പി.ടി.എസ്
കളിക്കാരുടെ വ്യക്തിഗത മികവ് അളക്കുന്ന സംവിധാനമാണ്​ ഇലക്​ട്രോണിക്​ പെർഫോമൻസ്​ ആൻഡ്​​ ട്രാക്കിങ്​ സിസ്​റ്റം. ഇതും ഒരു ചെറിയ ഒരു ചിപ്പിലാണ് രൂപപ്പെടുത്തിയിരിക്കുന്നത്. കളിക്കാരുടെ ജഴ്​സിക്ക്​ അടിയിലുള്ള കുപ്പായത്തിലാണ് ഇതി​​​െൻറ സ്ഥാനം. ഒരു കളിക്കാരൻ എത്ര തവണ പന്ത് തട്ടി, എത്ര പാസുകൊടുത്തു, എത്ര ചുവടുകൾ ഓടി എന്നുവരെ കണ്ടെത്താനാകും.