ഇംഗ്ലീഷ് പ്രീമിയർ ലീഗ്: ലിവർപൂളിന് ജയം

ലിവർപൂൾ: ഇംഗ്ലീഷ് പ്രീമിയർ ലീഗിൽ സ്റ്റോക്ക് സിറ്റിയെ തകർത്ത് ലിവർപൂളിന് ജയം. ആൻഫീൽഡിൽ നടന്ന മത്സരത്തിൽ ഒരു ഗോളിന് പിന്നിലായശേഷമാണ് നാലു ഗോൾ അടിച്ച് ലിവർപുൾ ജയിച്ചു കയറിയത്. ഇതോടെ 18 മത്സരങ്ങളിൽ 40 പോയിന്റുമായി ലീഗിൽ രണ്ടാമതെത്തി ലിവർപൂൾ.

35 ാം മിനിറ്റിൽ ആദം ലല്ലാന, 44 ാം മിനിറ്റിൽ റോബർട്ടോ ഫിർമിനോ, 71–ാം മിനിറ്റിൽ ഡാനിയേൽ സ്റ്ററിഡ്ജ് എന്നിവരാണ് ലിവർപൂളിന് വേണ്ടി സ്കോറർമാർ. സ്റ്റോക്കിന്റെ ഫ്രഞ്ച് മിഡ്ഫീൽഡർ ഇംബുലയുടെ പിഴവിൽ നിന്നുള്ള സെൽഫ് ഗോള് കൂടിയായതോടെ പട്ടിക പൂർത്തിയായി. 12 ാം മിനിറ്റിൽ ജോനാഥൻ വാൾട്ടേഴ്സാണ് സ്റ്റോക്കിന്റെ ഏകഗോൾ നേടിയത്.