ഇൻറർനാഷനൽ ചാമ്പ്യൻസ്​​ കപ്പ്​: ബൊറൂസിയയോട് തോറ്റ് എ.സി മിലാൻ

ഗുവാങ്​സോ (ഹോങ്കാങ്​): പുതിയ സീസണ്​​ വൻ ട്രാൻസ്​ഫറുകളുമായി ഒരുങ്ങിയ ഇറ്റാലിയൻ കരുത്തർ​ എ.സി മിലാന്​​ തോൽവിയോടെ സീസൺ തുടക്കം. ഇൻറർനാഷനൽ ചാമ്പ്യൻസ്​​ കപ്പിൽ ജർമൻ കരുത്തരായ ബൊറൂസിയ ഡോർട്ട്​മുണ്ടിനോട്​ 3-1നാണ്​ മിലാൻ തോറ്റത്​. സൂപ്പർതാരം എംറിക്​ ഒബൂമെയാങ്​ രണ്ടു ഗോളുകളുമായി നിറഞ്ഞുനിന്നപ്പോൾ ബൊറൂസിയ​ൻ ​കൊടുങ്കാറ്റിനെ തടഞ്ഞുനിർത്താനാകാതെ മിലാൻ ശരിക്കും വിയർത്തു. 
 
ആവേശകരമായ മത്സരത്തിൽ 16ാം മിനിറ്റിലാണ്​ മിലാ​​െൻറ വല ആദ്യം കുലുങ്ങുന്നത്​. ക്രിസ്​റ്റ്യൻ പുലിസിച്ചി​​െൻറ പാസിൽ തുർക്കി താരം നൂരി സാഹിനാണ്​ വലകുലുക്കിയത്​. പിന്നാലെ 20ാം മിനിറ്റിൽ ഭാഗ്യമെന്നോണം ബൊറൂസിയക്ക്​ പെനാൽറ്റിയും ലഭിച്ചു. കി​ക്കെടുത്ത ഒാബൂമെയാങ്​ പിഴക്കാതെ ലക്ഷ്യം കണ്ടു. 24ാം മിനിറ്റിൽതന്നെ കൊളംബിയൻ താരം കാർലോസ്​ ബാക്ക തിരിച്ചടിച്ചെങ്കിലും പിന്നീട്,​ മിലാന്​ സമനില പിടിക്കാനായില്ല. രണ്ടാം പകുതിൽ 62ാം മിനിറ്റിൽ ഒബൂമെയാങ്​​ വീണ്ടും വലകുലുക്കിയ​േതാടെ മിലാ​​െൻറ തോൽവി ഉറപ്പിച്ചു.