എതിർ താരത്തെ കടിച്ച പാട്രീസിന്​ നാല്​ കളികളിൽ വിലക്ക്​; 10,000 യൂറോ പിഴ

റോമ: കോവിഡിൻെറ കടുത്ത നിയന്ത്രണങ്ങൾക്കിടയിലും ഫുട്​ബാൾ മൈതാനങ്ങൾ സജീവമാകുന്നതിനിടെ ‘കടി’ ചരിതങ്ങളും ഉയരുന്നു.  കഴിഞ്ഞ ദിവസം ഇറ്റാലിയൻ ലീഗിൽ ലാസിയോ - യു.എസ് ലാചെസെ മത്സരത്തിനിടയിൽ ലാസിയോ ഡിഫൻഡർ ഗിൽ പാട്രീസ് എതിർ ടീമിലെ ഡൊണാറ്റി യുടെ കൈയിൽ കടിച്ച് ചുകപ്പു കാർഡ് കണ്ടു പുറത്തുപോയതാണ്​ അവസാന സംഭവം. ഉറുഗ്വ താരം സുവരസിൻെറ പിൻഗാമിയുടെ ശിക്ഷ റെഡ്​കാർഡിൽ അവസാനിച്ചില്ല.

ഇറ്റാലിയൻ ലീഗ് ഫെഡറേഷൻ 10,000 യുറോ പിഴയും നാല്​ കളികളിൽ വിലക്കും ഏർപ്പെടുത്തി. പാട്രീസിൻെറ കടി വിലയേറിയതാണെങ്കിലും സുവരസിൻെറ റെ​ക്കോർഡിന്​ അടുത്തൊന്നും എത്താനായില്ല. ഉറുഗ്വേ ദേശീയ താരത്തിന് ലോകകപ്പ് കടിക്ക് കിട്ടിയത് നാല്​ മാസത്തെ കളി വിലക്കും ഒമ്പത്​ അന്തർ ദേശീയ മത്സരങ്ങളിൽ നിന്നുള്ള ഒഴിവാക്കലും പിന്നെ 82,000 ഡോളർ പിഴയും ആയിരുന്നു. വിചിത്രവും രസകരവുമായ കാര്യം അദേഹത്തിൻെറ ആദ്യ കടി ശിക്ഷയായിരുന്നില്ല എന്നതാണ്. മൂന്നാം തവണയാണ്​ ശിക്ഷ ലഭിക്കുന്നത്​.  

2010ൽ  ഹോളണ്ട് ലീഗിൽ അയാക്​സിന് കളിക്കുമ്പോൾ പി.എസ്​.വിയുടെ ഒട്ടുമാൻ ബക്കലിനെ കടിച്ചുകൊണ്ടായിരുന്നു തുടക്കം. അത് മത്സരം നിയന്ത്രിച്ച റഫറി ക്യയ്‌പ്പേഴ്‌സ് കണ്ടതുമില്ല. എന്നാൽ, കടികൊണ്ടയാൾ ബഹളം വച്ചപ്പോൾ ടെലിവിഷൻ രംഗങ്ങൾ പരിശോധിച്ചശേഷം ഫെഡറേഷൻ ഏഴ്​ മത്സരങ്ങളിൽനിന്ന്​ വിലക്കി.

2013ൽ പ്രീമിയർ ലീഗിൽ ലിവർപൂളിന് കളിക്കുമ്പോൾ ചെൽസിയിലെ ബ്രാൻസിലാവ് ഇവാനോവിച്ചിൻെറ കൈക്കിട്ടൊരു കടികൊടുത്തു. ഇവിടെ റഫറി  കെവിൻ ഫ്രണ്ട് ശിക്ഷ ഒന്നും നൽകിയില്ല. എന്നാൽ, തുടർ പരിശോധനയിൽ ഇംഗ്ലീഷ് ഫുട്​ബാൾ ഫെഡറേഷൻ വിധിച്ചത് പത്ത്​ കളി വിലക്കും കാര്യമായ പിഴ ശിക്ഷയും ആയിരുന്നു. മൂന്നാമത്തേതാണ് വിഖ്യാതമായ 2014 ലോകകപ്പിലെ ഗ്രൂപ്പ് ഡി മത്സരത്തിൽ ഉറുഗ്വേ ഇറ്റലിക്കെതിരെ കളിക്കുമ്പോൾ ചെല്ലിനിയുടെ ഷോൾഡർ  കടിച്ച് പറിച്ചത്.

അന്നത്തെ ശിക്ഷക്ക് എതിരെ അദ്ദേഹം ലോക സ്പോർട്​സ്​ കോടതിയെ സമീപിച്ചെങ്കിലും അന്തർ ദേശീയ കളി വിലക്കുകളിൽ ഇളവ് ലഭിച്ചില്ല. എന്നാൽ, ബാഴ്​സലോണ ടീമിനൊപ്പം പരിശീലിക്കാനും പ്രാദേശിക മത്സരങ്ങളിൽ കളിക്കാനുമുള്ള അനുമതി ലഭിക്കുകയുണ്ടായി.