ചെൽസി 2, ആഴ്​സനൽ 2; ​ത്രില്ലർപോര്​ സമനിലയിൽ

ലണ്ടൻ: എമിറേറ്റ്​സ്​ സ്​റ്റേഡിയത്തിലെ വമ്പൻ പോരിന്​ സമനിലയിൽ അവസാനം. അടിയും തിരിച്ചടിയും കണ്ട വമ്പന്മാരുടെ കൊമ്പുകോർക്കൽ 2-2നാണ്​ തീർന്നത്​. തോൽവി മുന്നിൽ ക​ണ്ടിരിക്കെ, അവസാന നിമിഷം ചെൽസിയുടെ വലകുലുക്കി ടീമിനെ രക്ഷപ്പെടുത്തിയ ഹെക്​ടർ ബെല്ലറീന്​ ആഴ്​സനൽ ആരാധകർ നന്ദിപറയണം. അവസരങ്ങളുടെ പെരുമഴയായിരുന്നു ഇരു ടീമുകൾക്കും. ആദ്യ പകുതിയിൽതന്നെ ചെൽസിക്കും ആഴ്​സനലിനും കിട്ടിയത്​ അരഡസനോളം അവസരങ്ങളാണ്​.

ഷോട്ടുകളും ത്രൂപാസുകളുമെല്ലാം തെന്നിമാറിയപ്പോൾ താരങ്ങളായത് ഗോൾ കീപ്പർമാരായ പീറ്റർ ചെക്കും തിബോട്ട് കൊർേട്ടായിസും. ചെൽസിതാരം അൽവാരോ മൊറാറ്റ സുവർണാവസരങ്ങൾ വരെ കളഞ്ഞുകുളിച്ചു. എന്നാൽ, രണ്ടാം പകുതി കളിമാറി. ഇരു വലയിലും പന്തെത്തിയത് നാലുതവണ. ഗണ്ണേഴ്സി​െൻറ ജാക് വിൽഷേറാണ് (67) ഉശിരൻ ഷോട്ടിലൂടെ ആദ്യ വെടിപൊട്ടിച്ചത്. ഇതിന് മൂന്നു മിനിറ്റിനകം, വീണുകിട്ടിയ പെനാൽറ്റിയിൽ ഏഡൻ ഹസാഡ് മറുപടിനൽകി. 84ാം മിനിറ്റിൽ മാർകോ അലെൻസോയും ഗോൾ നേടിയതോടെ ആഴ്സനൽ തോൽവി ഉറപ്പിച്ചതാണ്. എന്നാൽ, ഇഞ്ച്വറി സമയത്ത് ഗണ്ണേഴ്സി​െൻറ രക്ഷകനായി ബെല്ലറീൻ എത്തുകയായിരുന്നു. ഇതോടെ ചെൽസി (46) വീണ്ടും യുനൈറ്റഡിനു (47) പിറകിൽ മൂന്നാമതായി. ആഴ്സനൽ (39) ആറാം സ്ഥാനത്താണ്.