ഏകദിന പരമ്പരയും കിവികള്‍ക്ക്

മൗണ്ട് മൗന്‍ഗാനി (ന്യൂസിലന്‍ഡ്): മാര്‍ട്ടിന്‍ ഗുപ്റ്റിലിന്‍െറ പത്താം സെഞ്ച്വറിയുടെ മികവില്‍ ശ്രീലങ്കക്കെതിരായ അഞ്ചാം ഏകദിനവും പരമ്പരയും ന്യൂസിലന്‍ഡിനും സ്വന്തം. അവസാന ഏകദിനത്തില്‍ 36 റണ്‍സിനാണ് കിവികള്‍ ലങ്കയെ മറികടന്നത്. ആദ്യം ബാറ്റുചെയ്ത ആതിഥേയര്‍ 50 ഓവറില്‍ അഞ്ചു വിക്കറ്റിന് 294 റണ്‍സെടുത്തു. 
മറുപടി ബാറ്റിങ്ങിനിറങ്ങിയ ലങ്ക 47.1 ഓവറില്‍ 258 റണ്‍സിന് എല്ലാവരും പുറത്തായി. 102 റണ്‍സുമായാണ് ഓപണറായ ഗുപ്റ്റില്‍ ടോപ്സ്കോററായത്. ക്യാപ്റ്റന്‍ കെയ്ന്‍ വില്യംസണും റോസ് ടെയ്ലറും 61 റണ്‍സ് വീതം നേടി. ലങ്കന്‍ നായകന്‍ എയ്ഞ്ചലോ മാത്യൂസ് 95 റണ്‍സുമായി പൊരുതി. അഞ്ചു വിക്കറ്റ് വീഴ്ത്തിയ ആതിഥേയ ബൗളര്‍ മാറ്റ് ഹെന്‍റിയാണ് കളിയിലെ കേമന്‍.