ആഷിഖ് കുരുണിയന്‍ പുണെ സിറ്റിയില്‍

മലപ്പുറം: ഇന്ത്യന്‍ സൂപ്പര്‍ ലീഗില്‍ എഫ്.സി പുണെ സിറ്റിക്ക് വേണ്ടി കളിക്കാന്‍ മലപ്പുറത്തുകാരന്‍. പട്ടര്‍ക്കടവ് സ്വദേശി മുഹമ്മദ് ആഷിഖ് കുരുണിയനാണ് പുണെ ടീമിന്‍െറ ജഴ്സിയണിയുക. നേരത്തെ ഡല്‍ഹി ഡൈനാമോസ് ആഷിഖുമായി സംസാരിച്ചിരുന്നെങ്കിലും ഐ ലീഗ് ടീമായ പുണെ എഫ്.സിയില്‍ നിന്ന് വിടുതല്‍ രേഖ ലഭിക്കാത്തതിനാല്‍ ഇവരുമായി കരാറൊപ്പിടാന്‍ സാധിച്ചിരുന്നില്ല. പുണെ എഫ്.സി അക്കാദമിയെ എഫ്.സി പുണെ സിറ്റി വാങ്ങിയതോടെ ആഷിഖ് ഈ ടീമിന്‍െറ താരമായി. അണ്ടര്‍ 19 ഇന്ത്യന്‍ ടീം അംഗം കൂടിയായ ഈ താരം മലപ്പുറം എം.എസ്.പി ഹയര്‍ സെക്കന്‍ഡറി സ്കൂളില്‍ നിന്നാണ് പുണെ എഫ്.സിയുടെ അക്കാദമിയിലത്തെിയത്. രണ്ട് സീസണില്‍ അണ്ടര്‍ 18 ഐ ലീഗില്‍ പുണെ എഫ്.സിയുടെ ജഴ്സിയണിഞ്ഞു. പട്ടര്‍ക്കടവിലെ കുരുണിയന്‍ അസൈന്‍-ഖദീജ ദമ്പതികളുടെ മകനാണ്. പരിശീലനത്തിനായി വൈകാതെ സ്പെയിനിലേക്ക് പോകും. ഈ വര്‍ഷം മഞ്ചേരി എന്‍.എസ്.എസ് കോളജില്‍ ചേര്‍ന്ന ആഷിഖ് കോച്ച് കെ. ഷാജിറുദ്ദീന് കീഴില്‍ ബുധനാഴ്ച പയ്യനാട് സ്റ്റേഡിയത്തില്‍ പരിശീലത്തിനുണ്ടായിരുന്നു. അനസ് എടത്തൊടികയും (ഡല്‍ഹി ഡൈനാമോസ്) എം.പി. സക്കീറുമാണ് (ചെന്നൈയിന്‍ എഫ്.സി) ഐ.എസ്.എല്ലിലെ മറ്റ് മലപ്പുറത്തുകാര്‍.