മുൻ ഫുട്ബാൾ താരം മോഹൻദാസ് മേയന മുങ്ങിമരിച്ചു

കോഴിക്കോട്: മുൻ കേരള ഫുട്ബാൾ താരം മോഹൻദാസ് മേയന (62) മുങ്ങിമരിച്ചു. കർണാടകയിലെ വിരാജ്പേട്ടയിലാണ് അപകടമുണ്ടായത്. വിഷു ആഘോഷവുമായി ബന്ധപ്പെട്ട് സുഹൃത്തുക്കൾക്കൊപ്പം വിനോദയാത്ര പോയതായിരുന്നു. എഴുപതുകളിൽ കേരള ടീമിൻെറയും തിരുവനന്തപുരം ടൈറ്റാനിയത്തിൻെറയും മുൻനിര താരമായിരുന്നു മോഹൻദാസ്.

ടൈറ്റാനിയത്തിൻെറ താരമെന്ന നിലയിലാണ് മോഹൻദാസ് ഏറെ അറിയപ്പെട്ടത്. എഴുപതുകളുടെ പകുതിയിൽ കേരള ടീമിനുവേണ്ടി കളിച്ചു. കാലിക്കറ്റ് യൂനിവേഴ്സിറ്റിക്കുവേണ്ടിയും ബൂട്ടണിഞ്ഞു. 1975ൽ കാലിക്കറ്റിൻെറ ദേശീയ കിരീട നേട്ടത്തിൽ മുഖ്യപങ്കുവഹിച്ചു. ടൈറ്റാനിയത്തിൽ ജോലിയുള്ളതുകൊണ്ടുതന്നെ ഏറെക്കാലം തിരുവനന്തപുരത്തായിരുന്നു താമസം. ഒരു വർഷം മുമ്പാണ് ജോലിയിൽ നിന്ന് വിരമിച്ചത്.

മിനിയാണ് ഭാര്യ. മോനിഷ്, മേഘ എന്നിവർ മക്കളാണ്. ഫുട്ബാൾ താരമായിരുന്ന നടരാജനാണ് സഹോദരൻ. വീരാജ്പേട്ടയിൽ പോസ്റ്റുമോർട്ടം നടത്തി മൃതദേഹം കോഴിക്കോട്ട് എത്തിക്കും.