ആ രാത്രി യുവരാജ് പറഞ്ഞു; ‘എനിക്കൊട്ടും വയ്യ, നീ തയാറായി നിൽക്ക്​’ ടെസ്​റ്റ്​ അരങ്ങേറ്റത്തെ കുറിച്ച്​ റെയ്​ന

17:59 PM
31/05/2020
yuvraj-and-raina

ഇന്ത്യയുടെ എണ്ണം പറഞ്ഞ ഫീൽഡർമാരിലൊരാളും വെടിക്കെട്ട്​ ബാറ്റ്​സ്​മാനുമാണ്​​ സുരേഷ്​ റെയ്​ന. തൻെറ ആദ്യ ടെസ്​റ്റ്​ അരങ്ങേറ്റത്തെ കുറിച്ചും അതിലെ കന്നി സെഞ്ച്വറിയെ കുറിച്ചുമുള്ള ഓർമകൾ പങ്കുവെക്കുകയാണദ്ദേഹം. 2005ൽ ശ്രീലങ്കക്കെതിരെയായിരുന്നു റെയ്​നയുടെ ഏകദിന അരങ്ങേറ്റം. എന്നാൽ റൺസൊന്നുമില്ലാതെ മടങ്ങേണ്ടി വന്നു. പിന്നീട്​ അഞ്ച്​ വർഷമെടുത്താണ്​ ആദ്യ ടെസ്​റ്റ്​ മാച്ച്​ കളിക്കാൻ അവസരമൊത്തു വന്നത്​. അതും ശ്രീലങ്കക്കെതിരെ തന്നെ. മുൻ ഇന്ത്യൻ ഓൾറൗണ്ടർ യുവരാജ്​ സിങ്​ തന്നെ വിളിച്ച്​ ടെസ്​റ്റ്​ കളിക്കാൻ തയാറായി നിൽക്കാൻ പറഞ്ഞ സംഭവമാണ്​ മുൻ ഇന്ത്യൻ താരം ആകാശ്​ ചോപ്രയുമായി നടന്ന യു ട്യൂബ്​ അഭിമുഖത്തിൽ റെയ്​ന പങ്കുവെച്ചത്​.

യുവി പാ(യുവരാജ്​ സിങ്​) ടെസ്​റ്റിന്​ തൊട്ടുമുമ്പത്തെ രാത്രി എന്നെ വിളിച്ചു. എന്നിട്ട്​ പറഞ്ഞു, ‘എനിക്ക്​ ഒട്ടു​ം വയ്യ, നീ തയാറായിരിക്ക്​’ എന്ന്​. ഞാൻ കളിക്കാനാണ്​ സാധ്യതയെന്ന്​ അദ്ദേഹം പറഞ്ഞു. ഭക്ഷ്യ വിഷബാധയോ വയറു വേദനേയോ മറ്റോ ആയിരുന്നു. അതുകൊണ്ട്​ അദ്ദേഹത്തിന്​ കളിക്കാൻ സാധിച്ചില്ല.’’. കുമാർ സംഗക്കാര, തിലക രത്​ന ദിൽഷാൻ, മഹേല ജയവർധനെ തുടങ്ങിയ പ്രഗത്​ഭരുൾപ്പെടുന്ന ശ്രീലങ്കക്കെതിരെ കന്നി ടെസ്​റ്റ്​ കളിക്കുന്നതോർത്ത് അസ്വസ്​ഥമായതിനാൽ തനിക്ക്​​ ശരിക്ക്​ ഉറങ്ങാൻ സാധിച്ചില്ലെന്ന്​ റെയ്​ന കൂട്ടിച്ചേർത്തു.

റെയ്​നയുടെ ഭാഗ്യത്തിന്​ ശ്രീലങ്ക ടോസ്​ നേടുകയും ബാറ്റിങ്​ തെര​ഞ്ഞെടുക്കുകയും ചെയ്​തു. അതിനാൽ ആദ്യം ബാറ്റ്​ ചെയ്യേണ്ടി വന്നില്ല. ആദ്യ ഇന്നിങ്​സിൽ ശ്രീലങ്ക 642/4 ന്​ ഡിക്ലയർ ചെയ്​തു. ക്യാപ്​റ്റൻ സംഗക്കാര ഡബ്​ൾ സെഞ്ച്വറിയും(219) ജയവർധനെ(174), പർണവിതനെ(100) എന്നിവർ സെഞ്ച്വറിയും അടിച്ചു കൂട്ടി. ശ്രീലങ്കയിലെ ചുട്ടുപൊള്ളുന്ന അന്തരീക്ഷത്തിൽ രണ്ട്​ ദിവസം നീണ്ട ഫീൽഡിങ്​ ഇന്ത്യൻ ബൗളർമാ​രെ അസ്വസ്ഥമാക്കിയെങ്കിലും അത്​ റെയ്​നയെ​ മനസ്​ ശാന്തമാക്കാൻ സഹായിക്കുകയായിരുന്നു. 

‘‘ഭാഗ്യം കൊണ്ട്​ നമുക്ക്​ ടോസ്​ നഷ്​ടപ്പെടുകയും ഫീൽഡ്​ ചെയ്യേണ്ടിയും വന്നു. രണ്ട്​ ദിവസം കാര്യങ്ങൾ ഞാൻ ശരിക്ക്​ നിരീക്ഷിച്ചു. എൻെറ ബാറ്റിങ്​ വ​ന്നപ്പോൾ ഞാൻ തയാറായിരുന്നു. നമ്മളായിരുന്നു ആദ്യംബാറ്റ്​ ചെയ്​തിരുന്നതെങ്കിൽ എൻെറ ആദ്യ ഏകദിന​ത്തെ പോലെ റൺസൊന്നുമില്ലാതെ ഔട്ടാകാനായിരുന്നു സാധ്യത.’’ -റെയ്​ന പറഞ്ഞു.

വി.വി.എസ്​ ലക്ഷ്​മൺ ഔട്ടായതിനെ തുടർന്ന്​ റെയ്​ന ക്രീസി​ലെത്തി. സച്ചിനായിരുന്നു അങ്ങേയറ്റത്ത്​. 201 റൺസ്​ അകലെ വെച്ച്​ ഫോളോ ഓൺ ഒഴിവാക്കാൻ സാധിച്ചു.  റെയ്​ന 120 റൺസ്​ അടിച്ചെടുത്ത്​ ടെസ്​റ്റിലെ കന്നി സെഞ്ച്വറി സ്വന്തം പേരിൽ എഴുതിച്ചേർത്തു. സച്ചിൻ(203) ഡബ്​ൾ സെഞ്ച്വറിയെടുത്ത മത്സരത്തിൽ അദ്ദേഹത്തിനൊപ്പം 256 റൺസിൻെറ കൂട്ടുകെട്ട്​. ഫോളോ ഓൺ ഒഴിവാക്കാൻ സാധിച്ചുവെന്ന്​ മാത്രമല്ല, ശ്രീലങ്കയുടെ ആദ്യ ഇന്നിങ്​സിലെ റൺസ്​ മറികടക്കാനും സാധിച്ചു. വീരേന്ദർ സേവാഗ്​, എം.എസ്​. ധോണി എന്നിവർ അർധ സെഞ്ച്വറിയെടുത്തു. ആ ടെസ്​റ്റ്​ മാച്ച്​ സമനിലയിൽ അവസാനിച്ചു.

ഇതോടെ അരങ്ങേറ്റ ടെസ്​റ്റിൽ സെഞ്ച്വറിയെടുക്കുന്ന 12ാമത്​ ഇന്ത്യക്കാരനായി റെയ്​ന മാറി. ക്രിക്കറ്റിലെ മൂന്ന്​ ഫോർമാറ്റിലും നൂറ്​ റൺസ്​ എടുക്കുന്ന ആദ്യ ഇന്ത്യൻ താരമാവാനും ഇത്​ റെയ്​നയെ സഹായിച്ചു. ഇന്ത്യക്ക്​ വേണ്ടി 18 ടെസ്​റ്റ്​ മാച്ചുകളാണ്​ റെയ്​ന കളിച്ചത്​.
 

Loading...
COMMENTS