ഏഴ്​ പാക്​ ക്രിക്കറ്റ്​ താരങ്ങൾക്ക്​ കൂടി കോവിഡ്​

റാവൽപിണ്ടി: മൂന്ന്​ താരങ്ങൾക്ക്​ കോവിഡ്​ സ്ഥിരീകരിച്ചതായി പാകിസ്​താൻ​ ക്രിക്കറ്റ്​ ബോർഡ്​ (പി.സി.ബി) തിങ്കളാഴ്​ച അറിയിച്ചതിന്​ പിന്നാലെ ഇന്ന്​ ഏഴ്​ താരങ്ങൾക്ക്​ കൂടി വൈറസ്​ ബാധ. ഇംഗ്ലണ്ട്​ പര്യടനത്തിൽ പ​െങ്കടുക്കേണ്ടിയിരുന്ന മുഹമ്മദ് ഹഫീസ്, വഹാബ് റിയാസ് എന്നിവരടക്കം ഏഴ് പാക് ക്രിക്കറ്റ് താരങ്ങള്‍ക്ക്​ കൂടിയാണ്​ രോഗം സ്ഥിരീകരിച്ചത്​. ഇതോടെ കോവിഡുള്ള താരങ്ങളുടെ എണ്ണം പത്തായി.

കാഷിഫ് ഭാട്ടി, മുഹമ്മദ് ഹസ്‌നെയ്ന്‍, ഫഖര്‍ സമന്‍, മുഹമ്മദ് റിസ്വാന്‍, ഇമ്രാന്‍ ഖാന്‍, ഹഫീസ്, റിയാസ് എന്നിവര്‍ക്കാണ് ഇന്ന് കോവിഡ് സ്ഥിരീകരിച്ചത്. ഓൾ റൗണ്ടറായ ഷദബ്​ ഖാൻ, ബാറ്റ്​സ്​മാൻ ഹൈദർ അലി​, ഫാസ്​റ്റ്​ ബൗളർ ഹാരിസ്​ റഊഫ്​ എന്നിവർക്ക്​ തിങ്കളാഴ്​ച്ചയായിരുന്നു സ്ഥിരീകരിച്ചത്​. ടീമി​​​െൻറ സപ്പോര്‍ട്ടിങ്​ സ്റ്റാഫായ മാലങ്ക് അലിക്കും രോഗമുള്ളതായി പി.സി.ബി അറിയിച്ചിട്ടുണ്ട്​.

ഇംഗ്ലണ്ട്​ പര്യടനത്തിന്​ മുന്നോടിയായി റാവൽപിണ്ടിയിൽ വെച്ച്​ നടന്ന പരിശോധനയിലാണ്​ താരങ്ങൾക്ക്​ കോവിഡ്​ ബാധ കണ്ടെത്തിയത്​. 'ചെറുപ്പക്കാരും കായിക താരങ്ങളുമായ പത്ത് പേർക്കാണ്​ കോവിഡ്​ വന്നിരിക്കുന്നത്​. ക്രിക്കറ്റ്​ താരങ്ങൾക്ക്​ വരാമെങ്കിൽ ആർക്കും ഇത്​ പിടിപെടാം'. -പി.സി.ബി ക്രിക്കറ്റ്​ ബോർഡ്​ സി.ഇ.ഒ വസിം ഖാൻ മാധ്യമങ്ങളോട്​ പറഞ്ഞു.

പാകിസ്​താൻ ഈ മാസം 28നാണ്​ ഇംഗ്ലണ്ടിലേക്ക്​ തിരിക്കുന്നത്​. മൂന്ന് വീതം​ ടെസ്​റ്റുകളും ട്വൻറി20 മത്സരങ്ങളുമാണുള്ളത്​. ടെസ്​റ്റ്​പരമ്പരയിലെ ആദ്യ മത്സരം​ ആഗസ്​റ്റ്​ അഞ്ച്​ മുതൽ ഒമ്പത്​ വരെ മാഞ്ചസ്​റ്ററിലെ ഓൾഡ്​ ട്രഫോൾഡ്​ സ്​റ്റേഡിയത്തിൽ നടക്കും. രണ്ടാമത്തെ മത്സരം​ 13 മുതൽ 17 വരെയും മൂന്നാമത്തേത്​ 21 മുതൽ 25 വരെയും സതാംപ്​ടനിലാണ് ​നടക്കുക. ട്വൻറി20 മത്സരങ്ങളും ഇവിടെയാണ്​. ആഗസ്​റ്റ്​ 28, 30, സെപ്​റ്റംബർ ഒന്ന്​ തീയതികളിലാണ്​ ട്വൻറി20 മത്സരങ്ങൾ.