ലണ്ടനിൽനിന്ന്​ ലങ്കയിലെത്തിയ സങ്കക്കാര നിരീക്ഷണത്തിൽ

കൊളംബോ: കോവിഡ് 19 വൈറസ് ബാധയുടെ പശ്ചാത്തലത്തിൽ സ്വയം ഐസൊലേഷനിൽ പ്രവേശിച്ചതായി മുൻ ശ്രീലങ്കൻ ക്രിക്കറ്റ്​ ട ീം നായകൻ കുമാർ സങ്കക്കാര. ഇംഗ്ലണ്ടിൽനിന്ന് മടങ്ങിയ​ ശേഷം സർക്കാർ നിർദേശം അനുസരിച്ച് സ്വയം ഐസൊലേഷനിൽ പ്രവേശിച്ചെന്ന്​ അദ്ദേഹം തന്നെയാണ് അറിയിച്ചത്.

ഒരു ടിവി ചാനലിനു നൽകിയ അഭിമുഖത്തിലാണ് താരം ഇക്കാര്യങ്ങൾ പറഞ്ഞത്​. എനിക്ക്​ യാതൊരു രോഗലക്ഷണങ്ങളുമില്ല. ലണ്ടനിൽ നിന്നും രാജ്യത്തെത്തിയിട്ട്​ ഒരാഴ്​ചയായി. മാർച്ച്​ 1 മുതൽ 15 വരെ വിദേശത്ത്​ നിന്നും ലങ്കയിലെത്തിയവർ പേര്​ നൽകണമെന്നും വീട്ടുനിരീക്ഷണത്തിൽ കഴിയണമെന്നും നിർദേശമുള്ളതായി ഒരു ചാനലിൽ കണ്ടു. ഞാൻ അത്​ പാലിച്ചു -സങ്കക്കാര പറഞ്ഞു.

ഇംഗ്ലണ്ടിലെ മാർലിബോൺ ക്രിക്കറ്റ് ക്ലബ് പ്രസിഡൻറായ സങ്കക്കാര തിരികെയെത്തിയപ്പോൾ അധികൃതരെ വിവരം അറിയിക്കുകയും ആരോഗ്യ പ്രവർത്തകർ അദ്ദേഹത്തെ പരിശോധിക്കുകയുമായിരുന്നു. ഐസൊലേഷനിൽ കഴിയാൻ നിർദ്ദേശിക്കുകയും ചെയ്​തു. ഇതുവരെ സങ്കക്കാര രോഗലക്ഷണങ്ങളൊന്നും കാണിച്ചിട്ടില്ല.

അതേസമയം വിദേശത്ത്​ നിന്നുവന്ന മൂന്ന്​ പേർ പരിശോധനക്ക്​ വിധേയമാകാതെ ഒളിച്ചുകഴിയുകയാണെന്ന്​ ശ്രീലങ്കൻ സർക്കാർ കണ്ടെത്തിയതായി താരം പറഞ്ഞു.