സചി​ന്‍റെ രാജ്യസഭയി​ലെ കന്നി പ്രസംഗം തടസപ്പെട്ടു​ VIDEO

ന്യൂഡൽഹി: എം.പിയായിട്ടും രാജ്യസഭയിൽ കയറിയില്ലെന്ന വിമർശനം തീർക്കാനായി വന്നതായിരുന്നു ക്രിക്കറ്റ്​ ഇതിഹാസം സചിൻ ടെണ്ടുൽകർ. എന്നാൽ, രാജ്യസഭയിൽ സചിന് കമാ എന്നൊരക്ഷരം മിണ്ടാൻ പ്രതിപക്ഷ ബഹളത്തിൽ സാധിച്ചില്ല.
 
കുട്ടികൾക്ക്​ കളിക്കാനുള്ള അവകാശത്തെ കുറിച്ച സംവാദത്തി​ന്‍റെ തുടക്കമെന്ന നിലയിൽ ‘‘കളിക്കാനുള്ള അവകാശവും ഇന്ത്യൻ കായിക മേഖലയുടെ ഭാവിയും’’ എന്ന വിഷയത്തിൽ ചർച്ചക്കായി സചിൻ നോട്ടീസ്​ നൽകിയിരുന്നു. വിഷയം അവതരിപ്പിക്കാൻ ബുധനാഴ്​ച ഉച്ചക്കായിരുന്നു സചിന്​ ഉപാധ്യക്ഷൻ എം. വെങ്കയ്യ നായിഡു അനുമതി നൽകിയത്​. നിരവധി പദ്ധതികൾ അവതരിപ്പിക്കാൻ എഴുന്നേറ്റ സചിന് പ്രസംഗം നടത്താൻ സാധിച്ചില്ല.

ഗുജറാത്ത്​ തെരഞ്ഞെടുപ്പിൽ മുൻ പ്രധാനമന്ത്രി മൻമോഹൻ സിങ് പാകിസ്​താനുമായി ചേർന്ന്​ ഉപജാപം നടത്തിയെന്ന പ്രധാനമന്ത്രി​ നരേന്ദ്ര മോദിയുടെ ആരോപണം പിൻവലിക്കണമെന്നും മാപ്പ്​ പറയണമെന്നും ആവശ്യപ്പെട്ട്​ എം.പിമാർ ഒച്ചവെച്ചതോടെ സചിൻ പ്രസംഗം തുടരാൻ 10​ മിനിറ്റോളം കാത്തു​ നിന്നു. ഫലമുണ്ടായില്ലെന്ന്​ മാത്രമല്ല ​േകാൺഗ്രസ്​ എം.പിമാർ ബഹളം തുടർന്ന്​ കൊണ്ടേയിരുന്നു.

സഭാ അധ്യക്ഷൻ പരമാവധി ശ്രമിച്ചെങ്കിലും എം.പിമാർ​ ചെവി കൊണ്ടില്ല. ഭാരതരത്​ന നേടിയ സചി​ന്‍റെ വാക്കുകൾ ശ്രവിക്കാനായി രാജ്യം കാതോർക്കുകയാണ്​. നിങ്ങൾ നിശബ്​ദരാവണം. സ്​പോർട്​സാണ്​ ഇവിടെ ചർച്ച ചെയ്യുന്നതെന്നും വെങ്കയ്യ നായിഡു അംഗങ്ങളോട് പറഞ്ഞു. എന്നാൽ, ഇത് വകവെക്കാതെ പ്രതിപക്ഷം ബഹളം ശക്തമാക്കുകയും തുടർന്ന്​ സഭാ നടപടികൾ അധ്യക്ഷൻ നിർത്തിവെക്കുകയും ചെയ്യുകയായിരുന്നു. 

കഴിഞ്ഞ അഞ്ച് വർഷത്തിനിടെ രാജ്യസഭയിലെ ഒരു ചർച്ചയിൽ ആദ്യമായാണ് സചിൻ പങ്കെടുത്തു സംസാരിക്കുന്നത്.