ക്രിക്കറ്റ്​ പുനഃരാരംഭിക്കേണ്ട സമയമല്ലിത്​ -രാഹുൽ ദ്രാവിഡ്​

ന്യൂഡൽഹി: ഇന്ത്യയിൽ ലോക്​ഡൗൺ നിയന്ത്രണങ്ങളിൽ ഇളവ്​ വരുത്തിയിരിക്കുകയാണ്​. ​കോവിഡ്​ കേസുകൾ കുതിച്ചുയരു​േമ്പാഴും എല്ലാ മേഖലയിലും ഇളവുകൾ അനുവദിച്ചിട്ടുണ്ട്​. പുതിയ സാഹചര്യത്തിൽ ക്രിക്കറ്റ്​ മൽസരങ്ങൾ പുനഃരാരംഭിക്കണമെന്ന്​ വിവിധ കോണുകളിൽ നിന്ന്​ ആവശ്യമുയരുന്നുണ്ട്​. ഇതിനിടെ ഇക്കാര്യത്തിൽ അഭിപ്രായപ്രകടനം നടത്തിയിരിക്കുകയാണ്​ മുൻ ഇന്ത്യൻ നായകനും നാഷണൽ ക്രിക്കറ്റ്​ അക്കാദമി തലവനുമായ രാഹുൽ ദ്രാവിഡ്​.

ഇന്ത്യയിൽ ​ക്രിക്കറ്റ്​ ഇപ്പോൾ പുനഃരാരംഭിക്കാൻ പറ്റിയ സമയമല്ലെന്ന്​ രാഹുൽ ദ്രാവിഡ്​ പറഞ്ഞു. ക്ഷമയോടെ കാത്തിരിക്കുകയാണ്​ വേ​ണ്ടതെന്നും​ ദ വീക്ക്​ മാസികക്ക്​ നൽകിയ അഭിമുഖത്തിൽ​ രാഹുൽ ദ്രാവിഡ്​ വ്യക്​തമാക്കി.ആഗസ്​റ്റ്​-സെപ്​തംബർ മാസങ്ങളിലാണ്​ ആഭ്യന്തര മൽസരങ്ങൾ തുടങ്ങുന്നത്​. ദൈർഘ്യം കുറച്ച്​​ സീസൺ തുടങ്ങുന്നത്​ ഒരു മാസം നീട്ടിവെക്കാവുന്നതാണെന്നും രാഹുൽ പറഞ്ഞു.

പ്രാദേശിക തലത്തിലുള്ള ക്രിക്കറ്റ്​ താരങ്ങൾക്കായിരിക്കും എൻ.സി.എ ആദ്യഘട്ടത്തിൽ തുറന്ന്​ നൽകുക. മറ്റ്​ സ്ഥലങ്ങളിൽ നിന്നും എത്തുന്നവർ 14 ദിവസത്തെ ക്വാറൻറീനിൽ കഴിയേണ്ടി വരും. അത്​ പ്രായോഗികമാണോയെന്നത്​ പരിശോധിക്കേണ്ടി വരും. നിലവിലെ സാഹചര്യത്തിൽ എല്ലാ കാര്യത്തിലും അനിശ്​ചിതത്വം നിലനിൽക്കുന്നുണ്ടെന്നും രാഹുൽ ദ്രാവിഡ്​ വ്യക്​തമാക്കി.