Begin typing your search above and press return to search.
exit_to_app
exit_to_app
Homechevron_rightSportschevron_rightCricketchevron_rightവെല്ലുവിളിക്ക്​...

വെല്ലുവിളിക്ക്​ മുന്നിൽ ‘മുട്ടു കുത്താതെ’ സചിൻെറ മനം കവർന്ന്​ മഡ്​ഡ റാം -Video

text_fields
bookmark_border
വെല്ലുവിളിക്ക്​ മുന്നിൽ ‘മുട്ടു കുത്താതെ’ സചിൻെറ മനം കവർന്ന്​ മഡ്​ഡ റാം -Video
cancel

റായ്​പുർ (ഛത്തീസ്​ഗഡ്​): വിധിയുടെ വെല്ലുവിളിക്ക്​ മുന്നിൽ ‘മുട്ടു കുത്താതെ’, മുട്ടു കുത്തി ഓടി കൂട്ടുകാർക്കൊപ്പം ക്രിക്കറ്റ്​ കളിച്ച്​ ദേശീയ ശ്രദ്ധ നേടുകയാണ്​ ഛത്തീസ്​ഗഡിലെ ദന്തെവാഡയിലുള്ള മഡ്​ഡ റാം എന്ന 13കാരൻ.

പോളിയോ തളർത്തിയ കാലുകളുമായി ക്രിക്കറ്റ്​ കളിച്ച്​ കായിക പ്രേമികളുടെ മനം കവർന്ന മഡ്​​ഡയെ തേടി കഴിഞ്ഞ ദിവസമൊരു സമ്മാനമെത്തി. ഒരു ബാറ്റും ബാളും. അയച്ചത്​ മറ്റാരുമല്ല. സാക്ഷാൽ മാസ്​റ്റർ ബ്ലാസ്​റ്റർ സചിൻ ടെൻഡുൽക്കർ. കാലുകൾക്ക്​ ചലനശേഷി ഇല്ലാത്തതിനാൽ കൂട്ടുകാർക്കൊപ്പം ക്രിക്കറ്റ്​ കളിക്കുന്നതിനിടെ കാൽമുട്ടുകളും വലതും കൈയും കുത്തിയോടി റൺ എടുക്കുന്ന മഡ്​ഡയുടെ വീഡിയോ ഈ പുതുവത്സരദിനത്തിൽ സചിൻ ട്വിറ്ററിൽ പങ്കുവെച്ചിരുന്നു. വീഡ​​ിയോ വൈറലായതോടെ ക്രിക്കറ്റ്​ പ്രേമികൾക്കിടയിൽ താരമായതിൻെറ സന്തോഷത്തിലാണ്​ ഈ ദന്തെവാഡ കതെകല്യാൺ സ്വദേശി.

സചിൻെറ സമ്മാനമായി ബാറ്റും ബാളും എത്തിയതോടെ ഈ സന്തോഷത്തിന്​ ഇരട്ടി മധുരമായി. ‘മഡ്​ഡ റാം എന്ന ഈ ബാലൻ കൂട്ടുകാർക്കൊപ്പം ക്രിക്കറ്റ്​ കളിക്കുന്ന പ്രചോദനപരമായ വീഡിയോ കണ്ട്​ നിങ്ങളുടെ 2020 തുടങ്ങൂ. ഇത്​ എൻെറ മനം കവർന്നു. എനിക്കുറപ്പാണ്​, ഇത്​ നിങ്ങളുടെയും മനം കവരും’ എന്നാണ്​ വീഡിയോക്കൊപ്പം സചിൻ കുറിച്ചത്​.
അതിന്​ പിന്നാലെയാണ്​ മഡ്​ഡക്ക്​ സമ്മാനമായി സചിൻ ബാറ്റും ബാളും അയച്ചത്​. ‘നിനക്ക്​ ക്രിക്കറ്റിനോടുള്ള സ്​നേഹവും അർപ്പണവും അഭിനന്ദനാർഹമാണ്​. നീ ഈ ഗെയിം ആസ്വദിക്കുന്ന രീതി എന്നെ ആകർഷിച്ചു. കളി തുടരുക. നിനക്കും സുഹൃത്തുക്കൾക്കും എൻെറ ആശംസകൾ’ എന്ന കത്തും സമ്മാനത്തിനൊപ്പം സചിൻ നൽകി.

കർഷകനായ ഡൂമറാമിൻെറ മകനായ​ മഡ്​ഡ ഏഴാം ക്ലാസ്​ വിദ്യാർഥിയാണ്​. ചെറുപ്പത്തിൽ പോളിയോ വന്ന്​ കാലുകൾ തളർന്ന മഡ്​ഡ രണ്ട്​ വർഷമായി ക്രിക്കറ്റ്​ കളിക്കുന്നു. ‘എൻെറ കളി ശ്രദ്ധിക്കുകയും അതിൻെറ വീഡിയോ സോഷ്യൽ മീഡിയയിൽ പങ്കുവെക്കുകയും ചെയ്​ത സചിനോട്​ നന്ദിയുണ്ട്​. അദ്ദേഹത്തിൻെറ വാക്കുകൾ ഏറെ പ്രചോദനം നൽകുന്നു. ഒരു ഡോക്​ടറാകണമെന്നാണ്​ എൻെറ ആഗ്രഹം’ -മഡ്​ഡ റാം പറയുന്നു. സചിൻ തൻെറ ഗ്രാമം സന്ദർശിക്കണമെന്ന ആഗ്രഹവും മഡ്​ഡ മറച്ചുവെക്കുന്നില്ല. സചിൻെറ നല്ല വാക്കുകൾക്കും സമ്മാനത്തിനും നന്ദിയുണ്ടെന്ന്​ മഡ്​ഡയുടെ പരിശീലകൻ ശരത്​ കുമാറും പറഞ്ഞു.

കോസ, രാജ തുടങ്ങിയ കൂട്ടുകാരാണ്​ ക്രിക്കറ്റ്​ കളിക്കാൻ മഡ്​ഡയെ ​േ​പ്രാത്സാഹിപ്പിക്കുന്നത്​. മറ്റൊരു സുഹൃത്തായ ഗോലു തൻെറ പിതാവിൻെറ മൊബൈലിൽ പകർത്തിയ വീഡിയോയാണ്​ പിന്നീട്​ വൈറലായത്​. ഇതോടെ മഡ്​ഡക്കും കൂട്ടുകാർക്കും ക്രിക്കറ്റ്​ കിറ്റുമായി ബ്ലോക്ക്​ വിദ്യാഭ്യാസ ഓഫിസർ ഗോപാൽ പാണ്ഡെയെത്തി. ദന്തെവാഡ്​ കലക്​ടർ തോപേശ്വർ വെർമയും മഡ്​ഡയെ അഭിനന്ദിച്ച്​ രംഗത്തെത്തി.

Show Full Article
TAGS:madda ram sachin tendulkar cricket news 
News Summary - Meet Madda Ram, a kid of Dantevada who is inspiration for Sachin Tendulkar -Sports news
Next Story