ഇ​ന്ത്യ​ക്ക്​ വി​ജ​യ​ത്തു​ട​ക്കം

കട്ടക്ക്​: ബേസിൽ തമ്പിയുടെ അരങ്ങേറ്റം പ്രതീക്ഷിച്ച്​ ടി.വിക്കുമുന്നിൽ കുത്തിയിരുന്ന മലയാളികളെ നിരാശപ്പെടുത്തിയെങ്കിലും ആശ്വാസമൊരുക്കി ഇന്ത്യൻ വിജയം​. ശ്രീലങ്കക്കെതിരായ ട്വൻറി^20 പരമ്പരയിലെ ആദ്യ മത്സരത്തിൽ ഇന്ത്യ ജയിച്ചുകയറിയത്​​ 93 റൺസിന്​. ട്വൻറി^20യിൽ ഇന്ത്യയുടെ ഏറ്റവുമുയർന്ന മാർജിനിലുള്ള വിജയമാണിത്​. ആദ്യം ബാറ്റ്​ ചെയ്​ത ഇന്ത്യ ഉയർത്തിയ 181 റൺസ്​ വിജയലക്ഷ്യം പിന്തുടർന്ന ലങ്ക 87 റൺസിന്​ എല്ലാവരും പുറത്തായി. നാലു വിക്കറ്റ്​ വീഴ്​ത്തിയ യുസ്​വേന്ദ്ര ചഹലും മൂന്ന്​ വിക്കറ്റെടുത്ത ഹാർദിക്​ പാണ്ഡ്യയുമാണ്​ ലങ്കയെ തകർത്തെറിഞ്ഞത്​. ഒാപണർ ലോകേഷ്​ രാഹുൽ (48 പന്തിൽ 61), എം.എസ്​. ധോണി (22 പന്തിൽ 39), മനീഷ്​ പാണ്ഡേ (18 പന്തിൽ 32), ശ്രേയസ്​ അയ്യർ (20 പന്തിൽ 24) എന്നിവർ​ ഇന്ത്യൻ ബാറ്റിങ്​ നിരയിൽ തിളങ്ങി​. 

പേസ്​ ബൗളിങ്​ നിരയിൽ ബേസിൽ തമ്പിയെ പ്രതീക്ഷിച്ചെങ്കിലും ബുംറക്കൊപ്പം ഉനാദ്​കടി​നാണ്​ നറുക്ക്​ വീണത്​. ടോസിലെ ഭാഗ്യം ശ്രീലങ്കക്കായിരുന്നു. ബൗൾ ചെയ്യാനുള്ള ലങ്കയുടെ തീരുമാനം ശരിവെച്ച്​ നായകൻ രോഹിത്​ ശർമ​ (17) ആദ്യമെ തിരികെ നടന്നു. പകരമെത്തിയ ​​ശ്രേയസ്​ അയ്യർ ക്ഷമയോടെയാണ്​ തുടങ്ങിയതെങ്കിലും മറുവശത്ത്​ രാഹുൽ ബൗണ്ടറികൾ നേടി സ്​കോർ ഉയർത്തിക്കൊണ്ടിരുന്നു. അയ്യർ^രാഹുൽ സഖ്യം പിരിഞ്ഞതിന്​ പിന്നാലെ ധോണി^പാണ്ഡേ ജോടികൾ അരങ്ങിലെത്തി. അവസാന ഒാവറുകളിൽ ഇരുവരും തകർത്തടിച്ചതോടെയാണ്​ ഇന്ത്യ മികച്ച സ്​കോറിലെത്തിയത്​. 

ലങ്കക്ക്​ മുൻനിര താരങ്ങളായ ഡിക്ക്​വെല്ല (13), തരംഗ (23), പെരേര (19) എന്നിവർ പ്രതീക്ഷ നൽകിയെങ്കിലും മധ്യ നിരയും വാലറ്റവും തകർന്നടിഞ്ഞു. 39ന്​ ഒന്ന്​ എന്ന നിലയിൽ നിന്നാണ്​ 87ന്​ ഒാൾ ഒൗട്ടായത്​.