കനിക കപൂർ താമസിച്ച പഞ്ചനക്ഷത്ര ഹോട്ടലിൽ ദക്ഷിണാഫ്രിക്കൻ ടീമും

ലഖ്​നൗ: കോവിഡ്​ 19 സ്ഥിരീകരിച്ച്​ ആശുപത്രിയിൽ കഴിയുന്ന കനിക കപൂർ രോഗം സ്ഥിരീകരിക്കുന്നതിന്​ മുമ്പ്​ ലഖ്​നൗവിൽ തങ്ങിയ പഞ്ചനക്ഷത്ര ഹോട്ടലിൽ ഇന്ത്യൻ പര്യടനത്തിനെത്തിയ ദക്ഷിണാഫ്രിക്കൻ ടീമും ഉണ്ടായിരുന്നതായി റിപ്പോർട്ട്​. ഇന്ത്യയുമായുള്ള പരമ്പര​ നീട്ടിവെച്ചതിനാൽ അവർ ഹോട്ടലിൽ താമസിക്കുകയായിരുന്നു.

കഴിഞ്ഞ വെള്ളിയാഴ്​ച കോവിഡ്​ 19 സ്ഥിരീകരിച്ച കനിക കപൂർ മാർച്ച്​ 11 മുതൽ ലഖ്​നൗവിലെ ഹോട്ടലിലായിരുന്നു. അവിടെ നടന്ന ഭക്ഷണ വിരുന്നിൽ കനിക പ​ങ്കെടുത്തിരുന്നതായി ടൈംസ്​ ഓഫ്​ ഇന്ത്യ റിപ്പോർട്ട്​ ചെയ്തു. ബഫറ്റിൽ നിരവധിയാളുകൾ പ​ങ്കെടുത്തിരുന്നുവെങ്കിലും ദക്ഷിണാഫ്രിക്കൻ ടീമംഗങ്ങൾ ഉള്ളതായി സ്ഥിരീകരിച്ചിട്ടില്ല.

ഹോട്ടലിൽ നടന്ന ഒരു ന്യൂസ്​ ചാനലിൻെറ വാർഷിക കോൺക്ലേവിലും കനിക പ​ങ്കെടുത്തിരുന്നു. ബോളിവുഡ്​ ഗായികയുമായി ചടങ്ങിൽ ആരൊക്കെ അടുത്തിടപഴകിയെന്നത്​ ഹോട്ടലിലെ സി.സി.ടി.വി ദൃശ്യങ്ങൾ പരിശോധിച്ച്​ ഉറപ്പുവരുത്തണമെന്നും അധികൃതർ അറിയിച്ചു.

ഇംഗ്ലണ്ട്​ സന്ദർശനത്തിലായിരുന്ന കനിക മാർച്ച്​ പകുതിയോടെയാണ്​ ഇന്ത്യയിൽ തിരിച്ചെത്തിയത്​. തുടർന്ന്​ സ്വയം സമ്പർക്ക വിലക്കിലേക്ക്​ പോകാതെ വിവിധ പരിപാടികൾ പ​ങ്കെടുത്തു കറങ്ങിനടന്ന കനികക്കുനേരെ കടുത്ത വിമർശനങ്ങളാണുയരുന്നത്​. ലക്​നോയിൽ നടന്ന പാർട്ടിക്കിടെ കനികയെ കണ്ട മുൻ രാജസ്ഥാൻ മുഖ്യമന്ത്രി വസുന്ധരരാജെ സിന്ധ്യ, അവരുടെ മകനും ബി.ജെ.പി എം.പിയുമായ ദുഷ്യന്ത്​ സിങ്​ തുടങ്ങിയവർ ഐസൊലേഷനിലേക്ക്​ മാറിയിരുന്നു.