ഹൈദരാബാദിനെ നാലു വിക്കറ്റിന്​ തോൽപിച്ച് ബാംഗ്ലൂർ

ബംഗളൂരു: അവസാന അങ്കത്തിൽ ടീമി​​െൻറ പോരാട്ടവീര്യം കണ്ട ആർ.സി.ബിയുടെ ആരാധകർ, കോഹ്​ലിയും കൂട്ടരും ഇൗ കളി കുറച്ചു നേരത്തേ കളിച്ചിരുന്നെങ്കിൽ എന്ന് ആശിച്ചു പോയിട്ടുണ്ടാവും. പാർഥിവും (പൂജ്യം) കോഹ്​ലിയും (16) ഡിവില്ലിയേഴ്സും (ഒന്ന്) ആദ്യ മൂന്ന് ഒാവറിൽ കൂടാരം കയറിയിട്ടും നാലാം വിക്കറ്റിൽ 89 പന്തിൽ 144 റൺസി​​െൻറ കൂട്ടുകെെട്ടാരുക്കിയ ഹെറ്റ്​മെയറി​​െൻറയും ഗുർകീറത്ത് സിങ്ങി​​െൻറയും തകർപ്പൻ ബാറ്റിങ് മികവിൽ ഹൈദരാബാദിൽ നിന്ന് ബാംഗ്ലൂർ വിജയം കൊത്തിയെടുക്കുകയായിരുന്നു.

പ്ലേ ഒാഫ് സാധ്യത നേരത്തേ അസ്തമിച്ച ബാംഗ്ലൂർ ഇതോടെ അഞ്ചു ജയവും എട്ടു തോൽവിയുമായി 11 പോയ​േൻറാടെ വിരാട് കേഹ്​ലിയും കൂട്ടരും ഇൗ സീസണി​​െൻറ പടം മടക്കി. ചിന്നസ്വാമി സ്​റ്റേഡിയത്തിൽ നടന്ന മത്സരത്തിൽ ആദ്യം ബാറ്റ് ചെയ്ത ഹൈദരാബാദ് 43 പന്തിൽ 70 റൺസെടുത്ത ക്യാപ്റ്റൻ കെയ്ൻ വില്യംസണി​​െൻറ മികവിൽ ഏഴു വിക്കറ്റിന് 175 റൺസെടുത്തു. മറുപടി ബാറ്റിങ്ങിനിറങ്ങിയ ബാംഗ്ലൂർ നാലു പന്ത് ശേഷിക്കെ ആറു വിക്കറ്റ് നഷ്​​ടത്തിൽ 178 റൺസ് അടിച്ചെടുത്തു.

ഹെറ്റ്​മെയർ നാലു ഫോറും ആറു സിക്സുമടക്കം 47 പന്തിൽ 75 റൺസെടുത്തപ്പോൾ 48 പന്തിൽ 65 റൺസുമായി ഗുർകീറത്ത് സിങ് മികച്ച പിന്തുണയേകി. സ്പിന്നർ യുസ്​വേന്ദ്ര ചാഹൽ ട്വൻറി20യിലെ ത​​​െൻറ നൂറാം വിക്കറ്റും ഇൗ മത്സരത്തിൽ കണ്ടെത്തിയത് ബാംഗ്ലൂരിന് ഇരട്ടിമധുരമായി. വിജയികൾക്കുവേണ്ടി വാഷിങ്ടൺ സുന്ദർ മൂന്ന് ഒാവറിൽ 24 റൺസ് വഴങ്ങി മൂന്നു വിക്കറ്റെടുത്തു. ഹൈദരാബാദി​​െൻറ പ്ലേ ഒാഫ് സാധ്യതകൾ ഇനി കൊൽക്കത്തയുടെ കളിയെ കൂടി ആശ്രയിച്ചാണിരിക്കുന്നത്. കൊൽക്കത്ത അടുത്ത കളി തോറ്റാൽ മാത്ര​മേ പ്ലേ ഒാഫിന് യോഗ്യത നേടാനാവൂ.

ടോസ് നഷ്​ടപ്പെട്ട് ബാറ്റിങ്ങിനിറങ്ങിയ ഹൈദരാബാദിന് പ്രതീക്ഷയുള്ള തുടക്കം മാർട്ടിൻ ഗുപ്റ്റിലും(30) വൃദ്ധിമാൻ സാഹയും(20) ചേർന്ന് നൽകിയെങ്കിലും കണ്ണുംപൂട്ടിയടിച്ച് മധ്യനിര േവഗം കൂടാരം കയറി. മനീഷ്​ പാണ്ഡെ(9), വിജയ്​ ശങ്കർ(27), യൂസുഫ്​ പത്താൻ(3), മുഹമ്മദ്​ നബി(4) എന്നിവരല്ലൊ മടങ്ങിയെങ്കിലും വില്ല്യംസൺ (43 പന്തിൽ 70) പിടിച്ചുനിന്നതോടെയാണ് മികച്ച സ്​കോറിലേക്കെത്തിയത്​. ​ഉമേഷ് യാദവ് എറിഞ്ഞ അവസാന ഒാവറിൽ വില്യംസൺ 28 റൺസാണ് അടിച്ചുകൂട്ടിയത്.

ബാംഗ്ലൂരി​​െൻറ വിശ്വസ്തരായ മൂന്ന് ബാറ്റ്സ്മാന്മാർ എളുപ്പം മടങ്ങിയതോടെ തോറ്റെന്ന് കരുതിയിടത്തുനിന്നാണ് നാലാം വിക്കറ്റിൽ ഹെറ്റ്മേയറും ഗുർകീറത്തും വിസ്മയപ്രകടനം നടത്തിയത്.