വിൻഡീസിനെതിരെ ആദ്യ ട്വൻറി20യിൽ ഇന്ത്യക്ക് നാലുവിക്കറ്റ്​ ജയം

ലൗഡർഹിൽ (യു.എസ്​): വെസ്​റ്റിൻഡീസിനെതിരായ ആദ്യ ട്വൻറി20 മത്സരത്തിൽ ഇന്ത്യക്ക്​ നാലുവിക്കറ്റ്​ ജയം. പന്തെടുത്തവരെല്ലാം വിക്കറ്റെടുത്തപ്പോൾ കൂറ്റനടിക്കാരുടെ വിൻഡീസിനെ ഇന്ത്യ 20 ഒാവറിൽ ഒമ്പത്​ വിക്കറ്റിന്​ 95 റൺസിലൊതുക്കി. മറുപടി ബാറ്റിങ്ങിനിറങ്ങിയ ഇന്ത്യ രോഹിത്​ ശർമ (24), നായകൻ വിരാട്​ കോഹ്​ലി (19), മനീഷ്​ പാണ്ഡെ (19), ക്രുണാൽ പാണ്ഡ്യ (12) എന്നിവരുടെ മികവിൽ 17.2 ഒാവറിൽ ആറുവിക്കറ്റ്​ നഷ്​ടത്തിൽ ലക്ഷ്യം കണ്ടു.

കൃത്യമായ ഇടവേളകളിൽ വിക്കറ്റ്​ വീഴ്​ത്തി വിൻഡീസ്​ ബൗളർമാർ ഇന്ത്യയെ സമ്മർദത്തിലാക്കിയെങ്കിലും രവീന്ദ്ര ജ​ദേജയും (10 നോട്ടൗട്ട്​) വാഷിങ്​ടൺ സുന്ദറും (8 നോട്ടൗട്ട്​) ചേർന്ന്​ ഇന്ത്യയെ ലക്ഷ്യത്തിലെത്തിച്ചു.

ആദ്യം ബാറ്റുചെയ്​ത വിൻഡീസിനായി കീറൺ പൊള്ളാർഡും (49) നികോളസ്​ പുരാനും (20) മാത്രമാണ്​ രണ്ടക്കം കടന്നത്​.