അണ്ടർ 19 ലോക കപ്പ്​ ക്രിക്കറ്റ്​: പാകിസ്​താ​നെ 10 വിക്കറ്റിന്​ തറപറ്റിച്ച്​ ഇന്ത്യ ഫൈനലിൽ

പോഷെഫ്​റ്റ്​റൂം (ദക്ഷിണാ​ഫ്രിക്ക): പാകിസ്​താനെ 10 വിക്കറ്റിന്​ പരാജയപ്പെടുത്തി ഇന്ത്യൻ യൗവനങ്ങൾ അണ്ടർ 19 ലോക കപ്പ്​ ​ക്രിക്കറ്റി​​ൻറെ ഫൈനലിലേക്ക്​ അനായാസം മാർച്ച്​ ചെയ്​തു. തുടർച്ചയായ രണ്ടാം കിരീടം ലക്ഷ്യമാക്കി കുതിക ്കുന്ന ഇന്ത്യക്കു മുന്നിൽ വെല്ലുവിളി ഉയർത്താനാവാതെയായിരുന്നു പാക്​ കീഴടങ്ങൽ. തുടർച്ചയായ മൂന്നാം ഫൈനലിലേക്ക ാണ്​ ഈ വിജയത്തോടെ ഇന്ത്യ മാർച്ച്​ ചെയ്​തത്​. ബംഗ്ലാദേശ്​ - ന്യൂസിലാൻഡ്​ രണ്ടാം സെമിയിലെ ജേതാക്കളുമായി കലാശപ് പോരിൽ ഇന്ത്യ ഏറ്റുമുട്ടും.

പാകിസ്​ഥാൻ ഉയർത്തിയ 173 റൺസി​​ൻറെ ലക്ഷ്യം യശസ്വി ജയ്​സ്വാളി​​ൻറെ അത്യുജ്ജ്വല സെഞ്ച്വറിയുടെയും ദിവ്യാൻശ്​ സക്​സേനയുടെ അർധ സെഞ്ച്വറിയുടെയും ബലത്തിൽ ഇന്ത്യ അനായാസം മറികടക്കുകയായിരുന്നു. ആമിർ അലിയുടെ പന്ത്​ ജയ്​സ്വാൾ ലോങ്​ ഓണിലൂടെ സിക്​സറിന്​ പറത്തി വിജയവും സെഞ്ച്വറിയും ഒന്നിച്ചു വരുതിയിലാക്കുകയായിരുന്നു. അപരാജിതമായ ബാറ്റിങ്ങ്​ മികവിൽ ഇന്ത്യ കീഴടക്കുമ്പോൾ പിന്നെയും എറിയാൻ 88 പന്ത്​ ബാക്കിയുണ്ടായിരുന്നു. 113 പന്തിൽ നാല്​ സിക്​സറും എട്ട്​ ബൗണ്ടറിയുമടക്കമാണ്​ ജയ്​സ്വാൾ 105 റൺസെടുത്തത്​. 99 പന്തിൽ ആറ്​ ബൗണ്ടറികളുടെ അകമ്പടിയോടെയായിരുന്നു സക്​സേനയുടെ 59 റൺസ്​. പാക്​ ബൗളിങ്ങിന്​ ഒരവസരവും നൽകാതെയായിരുന്നു ഇരുവരുടെയും അപരാജിതമായ 176 റൺസിൻറെ ഒന്നാം വിക്കറ്റ്​ കൂട്ടുകെട്ട്​.

കിരീടം കാക്കാൻ: ഒന്നാം വിക്കറ്റിൽ 176 റൺസി​ൻറെ കൂട്ടുകെട്ടുയർത്തിയ യശസ്വി ജയ്​സ്വാളും ദിവ്യാൻശ്​ സക്​സേനയും

വരിഞ്ഞുകെട്ടി ഇന്ത്യൻ ബൗളർമാർ
നേരത്തെ ടോസ്​ നേടി ബാറ്റിങ്ങിനിറങ്ങിയ പാക്കിസ്​താൻ ഇന്ത്യൻ ബൗളിങ്ങിനു മുന്നിൽ അടിപതറി 43.1 ഓവറിൽ 172 റൺസിന്​ പുറത്താവുകയായിരുന്നു. തുടക്കം മുതലേ പാക്​ ബാറ്റ്​സ്​മാൻമാരെ വരിഞ്ഞുകെട്ടിയായിരുന്നു ഇന്ത്യൻ ബൗളർമാരുടെ പ്രകടനം. സ്​കോർ ബോർഡിൽ ഒമ്പതു റൺസ്​ പിറന്ന​പ്പോൾ തന്നെ ഓപ്പണർ മുഹമ്മദ്​ ഹുറൈറ നാല്​ റൺസുമായി മടങ്ങി. സുശാന്ത്​ മിശ്രയുടെ പന്തിൽ ദിവ്യാൻശ്​ സക്​സേന പിടിച്ചാണ്​ ഹുറൈറ പുറത്തായത്​. 16 പന്ത്​ നേരിട്ടിട്ടും അക്കൗണ്ട്​ തുറക്കാനാവാതെ ഫഹദ്​ മുനീർ രവി ബിഷ്​ണോയിക്ക്​ കീഴടങ്ങി. മറുവശത്ത്​ ഉറച്ചു നിന്നുകളിച്ച ഓപ്പണർ ഹൈദർ അലിക്ക്​ കൂട്ടായി ക്യാപ്​റ്റനും വിക്കറ്റ്​ കീപ്പറുമായി റുഹൈൽ നസീർ വന്നതോടെയാണ്​ പാക്​ ബാറ്റിങ്ങിന്​ പിടിച്ചുനിൽക്കാനായത്​.

അർധ സെഞ്ച്വറി നേടിയ പാക്​ ക്യാപ്​റ്റൻ റുഹൈൽ നസീറി​ൻറെ ബാറ്റിങ്​

77 പന്തിൽ 56 റൺസുമായി ഹൈദർ അലി കരയ്​ക്കു കയറിയതോടെ പാക്​ ബാറ്റിങ്ങ്​ വീണ്ടും പടുകൂ​​ഴിയിലായി. ക്വാസി അക്രം ഒമ്പത്​ റൺസിന്​ റണ്ണൗട്ടുമായി. പക്ഷേ, അഞ്ചാം വിക്കറ്റിൽ മുഹമ്മദ്​ ഹാരിസ്​ ക്യാപ്​റ്റന്​ കൂട്ടായി വന്നതോടെ പാക്​ ഇന്നിങ്​സ്​ പിട​ഞ്ഞെഴുന്നേൽക്കുമെന്ന്​ തോന്നിച്ചു. 15 പന്തിൽ ഒന്നു വീതം സിക്​സറും ബൗണ്ടറിയും പായിച്ച്​ മുഹമ്മദ്​ ഹാരിസ്​ കത്തിക്കാളുന്നതിനിടെയാണ്​ അഥർവ അ​​ങ്കോൽക്കറെ അനാവശ്യമായി ഉയർത്തിയടിച്ച ഹാരിസിനെ ഗംഭീരമായ ക്യാച്ചിലൂടെ സക്​സേന പിടികൂടിയത്​. പന്ത്​ നിലത്തു മുട്ടിയോ എന്ന്​ സംശയം തോന്നിപ്പിച്ച ക്യാച്ച്​ ടി.വി റീപ്ലേയിലുടെയാണ്​ സ്​ഥിരീകരിച്ചത്​. മൂന്ന്​ റൺസെടുത്ത ഇർഫാൻ ഖാൻറെ കുറ്റി കാർത്തിക്​ ത്യാഗി തെറുപ്പിച്ചു. അബ്ബാസ്​ അഫ്​രീദിയെ (2) രവി ബിഷ്​ണോയി വിക്കറ്റിനു മുന്നിൽ കുടുക്കി.

വിക്കറ്റ്​ മുറതെറ്റാതെ വീണുകൊണ്ടിരിക്കുമ്പോഴും അർധ സെഞ്ച്വറിയുമായി ഒരറ്റത്ത്​ പിടിച്ചുനിന്ന ക്യാപ്​റ്റൻ റുഹൈൽ നസീർ 102 പന്തിൽ 62 റൺസുമായി എട്ടാമനായി പുറത്തായതോടെ പാക്​ ചെറുത്തുനിൽപ്പ്​ തീർത്തും ദുർബലമായി. നസീർ ഉയർത്തിയടിച്ച സുശാന്ത്​ മിശ്രയുടെ പന്ത്​ തിലക്​ വർമയുടെ കൈയിൽ ഭദ്രമായി. ശേഷിച്ച രണ്ട്​ വിക്കറ്റുകൾ വെറും മൂന്ന്​ റൺസിനിടയിൽ ഇന്ത്യ എറിഞ്ഞിട്ടു.
സുശാന്ത്​ മിശ്ര മൂന്നും കാർത്തിക്​ ത്യാഗി, രവി ബിഷ്​ണോയി എന്നിവർ രണ്ടു വീതവും വിക്കറ്റ്​ വീഴ്​ത്തി.