Top
Begin typing your search above and press return to search.
exit_to_app
exit_to_app
Homechevron_rightSportschevron_rightCricketchevron_rightകൗറിന്​ സെഞ്ച്വറി;...

കൗറിന്​ സെഞ്ച്വറി; ഇന്ത്യ ഫൈനലിൽ

text_fields
bookmark_border
കൗറിന്​ സെഞ്ച്വറി; ഇന്ത്യ ഫൈനലിൽ
cancel

ഡെർബി: മഴക്കു​ പിന്നാലെ റൺമഴ പെയ്യിച്ച ഹർമൻപ്രീത്​ കൗറി​​​െൻറ മാസ്​മരിക സെഞ്ച്വറിയുടെ കരുത്തിൽ ആസ്​ട്രേലിയയെ 36 റൺസിന്​ തോൽപിച്ച്​ ഇന്ത്യൻ വനിതകൾ ക്രിക്കറ്റ്​ ലോകകപ്പി​​​െൻറ ഫൈനലിലെത്തി. കരുത്തരെന്ന്​ വിളിപ്പേരുള്ള നിലവിലെ ചാമ്പ്യൻമാരായ ആസ്​ട്രേലിയ​െയ സകലമേഖലയിലും തകർത്തെറിഞ്ഞാണ്​ ഇന്ത്യ കലാശപ്പോരിന് യോഗ്യത നേടിയത്​. ലോകക്രിക്കറ്റി​​​െൻറ ചരിത്രമുറങ്ങുന്ന ലോഡ്​സിലെ പുൽമൈതാനിയിൽ ഞായറാഴ്​ച നടക്കുന്ന ഫൈനലിൽ ഇംഗ്ലണ്ടാണ്​ ഇന്ത്യയുടെ എതിരാളികൾ.

രണ്ടാം തവണയാണ്​ ഇന്ത്യൻ വനിതകൾ ലോകകപ്പ്​ ഫൈനലിലെത്തുന്നത്​. 2005ലാണ്​ ഇതിന്​ മുമ്പ്​ ഇന്ത്യ ഫൈനലിലെത്തിയത്​. മഴമൂലം 42​ ഒാവറാക്കി ചുരുക്കിയ മത്സരത്തിൽ ഇന്ത്യ ഉയർത്തിയ 282 റൺസ്​ വിജയലക്ഷ്യം പിന്തുടർന്ന ഒാസീസ്​ 40.1 ഒാവറിൽ 245 റൺസിന്​ പുറത്തായി. എലീസ്​ വില്ലാനി (75), അലക്​സ്​ ബ്ലാക്​വെൽ (90) എന്നിവർക്ക്​ മാത്രമെ ഒാസീസ്​ നിരയിൽ തിളങ്ങാനായുള്ളു. 

മഴക്ക്​ പിന്നാലെ കൊടുങ്കാറ്റായി അവതരിച്ച ഹർമൻപ്രീത്​ കൗറായിരുന്നു സെമിയിലെ താരം. ഒറ്റയാൾ പോരാട്ടവുമായി മുന്നിൽ നിന്ന്​ നയിച്ച വൈസ്​ കാപ്​റ്റൻ 115 പന്തിൽ പുറത്താകാതെ നേടിയ 171 റൺസാണ്​ നീലപ്പടക്ക്​ ജയം സമ്മാനിച്ചത്​. ഇൗ ടൂർണമ​​െൻറിലെ ഏറ്റവും ഉയർന്ന വ്യക്​തിഗത സ്​കോറാണ്​ കൗറി​േൻറത്​. 20 ഫോറും ഏഴു​ സിക്​സും തീർത്ത കൗറി​​​െൻറ മൂന്നാം ​ഏകദിന സെഞ്ച്വറിയാണ്​ ഡെർബിയിലേത്​. ഇതോടെ, ദീപ്​തി ശർമക്കു​ പിന്നാലെ വനിത ക്രിക്കറ്റിൽ ഏറ്റവും ഉയർന്ന സ്​കോർ നേടുന്ന രണ്ടാമത്തെ ഇന്ത്യൻ താരമായി ഹർമൻപ്രീത്​ കൗർ. ലോക​ വനിത ക്രിക്കറ്റി​​​െൻറ കണക്കെടുത്താൽ അഞ്ചാം സ്​ഥാനത്താണ്​ കൗറി​​​െൻറ ഇന്നിങ്​സ്​. കഴിഞ്ഞ വർഷം ദക്ഷിണാഫ്രിക്കക്കെതിരെ ദീപ്​തി ശർമ നേടിയ 188 റൺസാണ്​ ഇന്ത്യൻ താരത്തി​​​െൻറ ഏറ്റവും ഉയർന്ന വ്യക്​തിഗത സ്​കോർ. 

ടോസുമായി ബാറ്റിങ്ങിനിറങ്ങിയ ഇന്ത്യയുടെ തുടക്കം മോശമായിരുന്നു. ക്യാപ്​റ്റൻ മിതാലി രാജ്​ (36), ദീപ്​തി ശർമ (25) എന്നിവർ മാത്രമാണ്​ കൗറിന്​ പിന്തുണ നൽകിയത്​. കഴിഞ്ഞ മത്സരങ്ങളിലെ പതിവ്​ പിന്തുടർന്ന് ഒാപണർ സ്​മൃതി മന്ദാന (ആറ്​) ആദ്യ ഒാവറിൽ തന്നെ പവിലിയനിൽ തിരിച്ചെത്തി. അധികം വൈകാതെ പൂനം കൗറും (14) മടങ്ങി. ക്യാപ്​റ്റൻ മിതാലി രാജ്​ ഇഴഞ്ഞുനീങ്ങിയെങ്കിലും കൗറുമൊത്ത്​ മികച്ചൊരു കൂട്ടുകെട്ടുണ്ടാക്കാനുള്ള ശ്രമത്തിലായിരുന്നു. അർധസെഞ്ച്വറി തികച്ചതിനു​ പിന്നാലെ ഗിയർ മാറ്റിയ കൗറാണ്​ ഇന്ത്യയെ അപ്രതീക്ഷിത സ്​കോറിലെത്തിച്ചത്​. 51ൽനിന്ന്​ സെഞ്ച്വറിയിലെത്താൻ 26 പന്ത്​ നേരിട്ട കൗർ സെഞ്ച്വറിയിൽനിന്ന്​ 150 കടക്കാൻ 17 പന്തുകൾ മാത്രമാണ്​ കളിച്ചത്​. 

ഒാസീസി​​​െൻറയും തുടക്കം തകർച്ചയോടെയായിരുന്നു. 21 റൺസെടുക്കുന്നതിനിടെ മുൻനിര താരങ്ങളായ ബോൾട്ടനും (14) മൂണിയും (ഒന്ന്​) ലാനിങും (പൂജ്യം) പുറത്തായി. നാലാം വിക്കറ്റിൽ പെറിയും വില്ലാനിയും ചേർന്ന കൂട്ടുകെട്ടാണ്​ പ്രതീക്ഷ നൽകിയത്​. മധ്യനിരയിലെ ചെറുത്തുനിൽപ്പിന്​ ശേഷം വാലറ്റം നിരുപാധികം കീഴടങ്ങിയതോടെ ഇന്ത്യ ജയം മണത്തു. എന്നാൽ, അവസാന വിക്കറ്റിൽ ക്രിസ്​റ്റൺ ബീംസിനെ കൂട്ടുപിടിച്ച്​ ബ്ലാക്ക്​വെൽ നടത്തിയ വെടിക്കെട്ട്​ ഒാസീസിന്​ വീണ്ടും പ്രതീക്ഷകൾ നൽകി. എന്നാൽ, രണ്ടോവർ മാത്രം ബാക്കി നിൽക്കെ ബ്ലാക്ക്​വെലിനെ വീഴ്​ത്തി ദീപ്​തി ഇന്ത്യക്ക്​ വിജയമൊരുക്കി. ഇന്ത്യക്കായി ദീപ്​തി ശർമ മൂന്നും ജുലാൻ ഗോസ്വാമി, ശിഖ പാണ്ഡേ എന്നിവർ രണ്ട്​ വിക്കറ്റ്​ വീതവും വീഴ്​ത്തി. 
 

Show Full Article
TAGS:women world cup india australia semi final sports news Cricket malayalam news 
News Summary - india enter into women world cup final-sports news
Next Story