ദ്രാവിഡ്​ ഇന്ത്യൻ ക്രിക്കറ്റ്​ ടീം പരിശീലകനായേക്കും; കുംബ്ലെ ഡയറക്ടർ സ്ഥാനത്തേക്ക്

മുംബൈ: മുൻ ഇന്ത്യൻ നായകൻ രാഹുൽ ​ദ്രാവിഡ്​ ക്രിക്കറ്റ്​ ടീം പരിശീലകനാവുമെന്ന്​ റിപ്പോർട്ടുകൾ. നിലവിൽ അണ്ടർ-19 ടീമി​െൻറ പരിശീലകനാണ്​ ദ്രാവിഡ്​. അനിൽ കുംബ്ലെക്ക്​ ഡയറക്​ടർ സ്ഥാനവും നൽകാനാണ്​ സാധ്യത.

ഇപ്പോൾ നടക്കുന്ന ആസ്​ട്രേലിയയുമായുള്ള പരമ്പര കഴിഞ്ഞ്​ ടീമിൽ വൻ അഴിച്ച്​ പണി നടത്താനാണ്​ ബി.സി.സി.​െഎയുടെ നീക്കം. ഏപ്രിൽ 14ാം തിയതി ദ്രാവിഡ്​ പരിശീലകനായി ചുമതലയേൽക്കുമെന്നാണ്​ വാർത്തകൾ.

ഇന്ത്യൻ ക്രിക്കറ്റിലെ വിവിധ ​ടീമുകളുടെ പ്രവർത്തനങ്ങളുടെ മേൽനോട്ടം ഒരാൾക്ക്​ നൽകാനുള്ള സാധ്യതകളും ബി.സി.സി.​െഎ പരിശോധിക്കുന്നുണ്ട്​. അങ്ങനെയെങ്കിൽ ടീം ഡയറക്​ടറാവുന്ന കുംബ്ലെക്കാവും വിവിധ ടീമുകളുടെ ചുമതല നൽകുക. ഇക്കാര്യത്തിൽ തീരുമാനമെടുക്കാൻ ബി.സി.സി.​െഎ കുംബ്ലെക്ക്​ സമയം അനുവദിച്ചിട്ടുണ്ട്​.

സച്ചിൽ തെണ്ടുൽക്കർ, സൗരവ്​ ഗാംഗുലി, വി.വി.എസ്​ ലക്ഷ്​മൺ എന്നിവരടങ്ങിയ കമ്മിറ്റിയിൽ നിന്ന്​ ഒരാളെ ബി.സി.സി.​െഎ ടീമുകളുടെ മത്സരങ്ങളുമായി ബന്ധപ്പെട്ട കാര്യങ്ങൾ കൈകാര്യം ​ചെയ്യാൻ ചുമതലയേൽപ്പിക്കുമെന്നും സൂചനയുണ്ട്​. അതേസമയം, പരിശീലക സ്ഥാനം ഏറ്റെടുക്കുന്നത്​ സംബന്ധിച്ച്​ രാഹുൽ ​ദ്രാവിഡ്​ ഇതുവരെ പ്രതികരിച്ചിട്ടില്ല.