പുജാരക്ക്​ എന്തുപറ്റി? ആദ്യ ടെസ്​റ്റ്​ ഇലവനില്ല

ബർമിങ്​ഹാം: ഇന്ത്യൻ പിച്ചിലും വിദേശത്തും ടെസ്​റ്റിലെ വിശ്വസ്​തനായിരുന്നു ചേതേശ്വർ പുജാര. ക്ഷമയോടെ തീതുപ്പുന്ന ബൗളുകളെ പ്രതിരോധിക്കുന്ന വന്മതിലിന്​ പക്ഷേ, സമീപ കാലം അത്ര നല്ലനിലയിലല്ല. ഇംഗ്ലണ്ടിനെതിരായ പ്രഥമ ടെസ്​റ്റിലെ ആദ്യ ഇലവനിൽ  താരത്തിന്​ ഇടംകിട്ടിയിട്ടില്ല. പകരം പരിമിത ഒാവറിൽ ഇംഗ്ലണ്ടിനെതിരെ മികച്ച പ്രകടനം കാഴ്​ചവെച്ച ലോകേഷ്​ രാഹുലിനെയാണ്​ രവിശാസ്​ത്രിയും ക്യാപ്​റ്റൻ വിരാട്​ കോഹ്​ലിയും വിശ്വാസത്തിലെടുത്തത്​. സമീപകാലത്തെ തുടർച്ചയായ ഫോമില്ലായ്​മയാണ്​ താരത്തിന്​ തിരിച്ചടിയായത്​. 

ഇംഗ്ലണ്ടിനെതിരായ ടെസ്​റ്റ്​ ടീമിൽ ഇടം പിടിക്കാനുള്ള ശ്രമവുമായാണ്​ ഇംഗ്ലീഷ്​ മണ്ണിൽ താരം നേരത്തെത​ന്നെ ബാറ്റുമായെത്തുന്നത്​. കൗണ്ടി ക്ലബ്​ യോർക്​ഷെയറിനൊപ്പം ചേർന്നെങ്കിലും സീസണിൽ കാര്യമായൊന്നും ചെയ്യാൻ കഴിഞ്ഞില്ല. തുടർച്ചയായ മത്സരങ്ങൾ പരാജയപ്പെട്ടത്​ ഇന്ത്യൻ ടീമിലേക്കുള്ള മടങ്ങിവരവിന്​ തിരിച്ചടിയായി. ഇംഗ്ലണ്ടിലെ പരമ്പരക്ക്​ ഒരുങ്ങാനായുള്ള, അഫ്​ഗാനിസ്​താനെതിരായ ഏക ടെസ്​റ്റിൽ അവസരം ലഭിച്ചെങ്കിലും 35 റൺസിന്​ പുറത്തായി.

ഒടുവിൽ ഇംഗ്ലണ്ടിലെത്തിയതിനുശേഷം എസ​ക്​സിനെതിരായ സന്നാഹത്തിലും പരാജയപ്പെട്ടു. 1, 23 എന്നിങ്ങനെയാണ്​ ഇരു ഇന്നിങ്​സിൽ താരത്തി​​െൻറ സ്​കോർ. ഇതോടെ, പുജാരയെ ആദ്യ ഇലവനിൽ ഉൾപ്പെടുത്തേണ്ടതില്ലെന്ന്​ കോച്ച്​ തീരുമാനിക്കുകയായിരുന്നു. 58 ടെസ്​റ്റുകളിൽ 4531 റൺസാണ്​ പുജാര അടിച്ചുകൂട്ടിയത്​. 50.34 ശരാശരിയുള്ള 30കാരന്​ 14 സെഞ്ച്വറിയുമുണ്ട്​. ഇംഗ്ലണ്ടിൽ ഇതുവരെ കളിച്ച അഞ്ചു ടെസ്​റ്റിൽ 222 റൺസും എടുത്തിട്ടുണ്ട്​. അടുത്ത മത്സരത്തിലെങ്കിലും തിരിച്ചെത്താനാവുമെന്നാണ്​ താരത്തി​​െൻറ പ്രതീക്ഷ.