അന്തര്‍ ജില്ലാ ക്രിക്കറ്റ്: മലപ്പുറത്തിന് ബാറ്റിങ് തകര്‍ച്ച

പെരിന്തല്‍മണ്ണ: അന്തര്‍ ജില്ലാ അണ്ടര്‍ 19 ദ്വിദിന ക്രിക്കറ്റ് ടൂര്‍ണമെന്‍റില്‍ കാസര്‍കോടിനെതിരെ മലപ്പുറത്തിന് ബാറ്റിങ് തകര്‍ച്ച. കാസര്‍കോട് 50 റണ്‍സിന്‍െറ ഇന്നിങ്സ് ലീഡ് നേടി. ടോസ് നേടി ബാറ്റിങ് തെരഞ്ഞെടുത്ത് ഇന്നിങ്സ് ആരംഭിച്ച കാസര്‍കോട് 43.4 ഓവറില്‍ 145ന് എല്ലാവരും പുറത്തായി. കാസര്‍കോടിന്‍െറ ആദിത്യ ചന്ദ്രന്‍ 48 റണ്‍സ് നേടി. മലപ്പുറത്തിന് വേണ്ടി ശ്രീരാഗ് 6.4 ഓവറില്‍ 25 റണ്‍സ് വഴങ്ങി നാല് വിക്കറ്റ് നേടി. തുടര്‍ന്ന് ഇന്നിങ്സ് ആരംഭിച്ച മലപ്പുറം 32.5 ഓവറില്‍ 95 റണ്‍സിന് എല്ലാവരും പുറത്തായി. മലപ്പുറത്തിന്‍െറ ശ്രീരാഗ് 25 റണ്‍സ് നേടി. കാസര്‍കോടിന്‍െറ ശ്രീഹരി എസ്. നായര്‍ 7.5 ഓവറില്‍ 11 റണ്‍സ് വഴങ്ങി അഞ്ച് വിക്കറ്റും അഫ്സല്‍ ഒമ്പത് ഓവറില്‍ 28 റണ്‍സ് വഴങ്ങി മൂന്ന് വിക്കറ്റും നേടി. രണ്ടാം ഇന്നിങ്സ് ആരംഭിച്ച കാസര്‍കോട് കളി നിര്‍ത്തുമ്പോള്‍ ഒമ്പത് ഓവറില്‍ രണ്ട് വിക്കറ്റ് നഷ്ടത്തില്‍ 26 റണ്‍സ് നേടിയിട്ടുണ്ട്.