അഞ്ചാം ഏകദിനവും ജയിച്ച് ഇംഗ്ലണ്ട് പരമ്പര തൂത്തുവാരി

കാഡിഫ്: ശ്രീലങ്കക്കെതിരായ അഞ്ചാം ഏകദിനവും ജയിച്ച് ഇംഗ്ളണ്ട് പരമ്പര തൂത്തുവാരി. ഒരു കളി സമനിലയിലും മറ്റൊന്ന് ഉപേക്ഷിക്കുകയും ചെയ്ത പരമ്പരയില്‍ 3-0ത്തിനായിരുന്നു ഇംഗ്ളീഷുകാരുടെ ജയം. സോഫിയ ഗാര്‍ഡന്‍സില്‍ നടന്ന അവസാന ഏകദിനത്തില്‍ വെടിക്കെട്ട് ബാറ്റിങ് മികവില്‍ 122 റണ്‍സിനായിരുന്നു ഇംഗ്ളണ്ടിന്‍െറ ജയം. ആദ്യം ബാറ്റുചെയ്ത ആതിഥേയര്‍ ഏഴു വിക്കറ്റ് നഷ്ടത്തില്‍ 324 റണ്‍സെടുത്തു. ജോ റൂട്ട് 93ഉം ജോസ് ബട്ലര്‍ 70ഉം ജെയിംസ് വിന്‍സ് 51ഉം റണ്‍സെടുത്ത് ഇംഗ്ളീഷ് ഇന്നിങ്സിലെ നട്ടെല്ലായി മാറി.
മറുപടി ബാറ്റിങ്ങില്‍ ശ്രീലങ്ക 42.4 ഓവറില്‍ 202 റണ്‍സിന് പുറത്തായി. 53 റണ്‍സെടുത്ത വിക്കറ്റ് കീപ്പര്‍ ദിനേഷ് ചണ്ഡിമലായിരുന്നു ടോപ് സ്കോറര്‍.
ധനുഷ്ക ഗുണതിലക 48 റണ്‍സെടുത്തു. 45 പന്തില്‍ 70 റണ്‍സെടുത്ത ബട്ലറാണ് കളിയിലെ കേമന്‍. ജാസണ്‍ റോയ് പരമ്പരയിലെ താരമായി.