മഴ തന്നെ; ടെസ്റ്റ് സമനിലയില്‍; ഇന്ത്യക്ക് ഒന്നാം റാങ്ക് നഷ്ടമായി

പോര്‍ട്ട് ഓഫ് സ്പെയിന്‍: നിര്‍ഭാഗ്യം മഴയുടെ രൂപത്തിലത്തെിയപ്പോള്‍ ഇന്ത്യക്ക് ടെസ്റ്റ് റാങ്കിങ്ങിലെ ഒന്നാം സ്ഥാനം നഷ്ടമായി. തുടര്‍ച്ചയായ നാലാം ദിവസവും മഴ മൂലം ഒരു പന്ത് പോലും എറിയാനാവാതെ വെസ്റ്റിന്‍ഡീസിനെതിരായ നാലാം ടെസ്റ്റ് സമനിലയിലായതോടെയാണ് ഇന്ത്യക്ക് ഒന്നാം റാങ്ക് പാകിസ്താന് മുന്നില്‍ അടിയറ വെക്കേണ്ടിവന്നത്. ആദ്യദിനം വിന്‍ഡീസ് രണ്ടു വിക്കറ്റിന് 62 എന്ന നിലയിലായിരിക്കെ എത്തിയ മഴയാണ് പിന്നീടുള്ള എല്ലാ ദിവസങ്ങളിലും ഇന്ത്യക്ക് മുന്നില്‍ വിലങ്ങുതടിയായത്. ടെസ്റ്റ് സമനിലയിലായെങ്കിലും ഒന്നും മൂന്നും മത്സരങ്ങള്‍ ജയിച്ച ഇന്ത്യ പരമ്പര 2-0ന് സ്വന്തമാക്കി. രണ്ടു മത്സരങ്ങളടങ്ങിയ ട്വന്‍റി20 പരമ്പര ശനി, ഞായര്‍ ദിവസങ്ങളില്‍ അമേരിക്കയിലെ ലൗഡര്‍ഹില്ലില്‍ നടക്കും.