ഇന്ത്യയെ പാകിസ്താന്‍ ബഹിഷ്കരിക്കുമെന്ന് റിപ്പോര്‍ട്ട്

കറാച്ചി: ഡിസംബറില്‍ കളിക്കാമെന്നേറ്റ ദ്വിരാഷ്ട്ര പരമ്പരയില്‍നിന്ന് പിന്മാറിയാല്‍ ഐ.സി.സി, ഏഷ്യന്‍ ക്രിക്കറ്റ് കൗണ്‍സില്‍ ടൂര്‍ണമെന്‍റുകളില്‍ ഇന്ത്യയെ ബഹിഷ്കരിക്കുമെന്ന് പാകിസ്താന്‍ ക്രിക്കറ്റ് ബോര്‍ഡ് ചെയര്‍മാന്‍ ഷഹരിയാര്‍ ഖാന്‍ പറഞ്ഞതായി റിപ്പോര്‍ട്ട്. ഇന്ത്യന്‍ സര്‍ക്കാറില്‍നിന്ന് ബി.സി.സി.ഐ ഇതുവരെ പരമ്പര കളിക്കാന്‍ അനുവാദം പോലും ചോദിച്ചിട്ടില്ല എന്നത് ദൗര്‍ഭാഗ്യകരമാണെന്ന് ഖാന്‍ പറഞ്ഞു.
ഇതുവരെ അവസാന തീരുമാനമൊന്നുമായിട്ടില്ളെന്നും ഇന്ത്യന്‍ ബോര്‍ഡ് അധികാരികളുടെ തീരുമാനം പിന്മാറാനാണെങ്കില്‍ ബഹിഷ്കരണം പരിഗണിക്കുമെന്നും ചെയര്‍മാന്‍ പറഞ്ഞതായി ഒരു പാക് പത്രമാണ് റിപ്പോര്‍ട്ട് ചെയ്തത്. ബി.സി.സി.ഐയുടെ സെക്രട്ടറി അനുരാഗ് താക്കൂര്‍ രാഷ്ട്രീയക്കാരനായതിനാലാണ് ഇന്ത്യ-പാക് ബന്ധത്തെക്കുറിച്ച് അദ്ദേഹം മോശം പ്രസ്താവനകള്‍ നടത്തുന്നതെന്നും ഷഹരിയാര്‍ ഖാന്‍ കുറ്റപ്പെടുത്തി.