റഷ്യന്‍ ഓപണ്‍: ഇന്ത്യക്ക് ഇരട്ടക്കിരീടം

മോസ്കോ: റഷ്യന്‍ ഗ്രാന്‍ഡ്പീ ഓപണില്‍ വനിതാ സിംഗ്ള്‍സിലും മിക്സഡ് ഡബ്ള്‍സിലും ഇന്ത്യക്കു കിരീടം. ഇന്ത്യയുടെ രണ്ടാം സീഡ് താരം ഋത്വിക ശിവാനി റഷ്യയുടെ എവ്ജെനിയ കോസെറ്റ്കയയെ 21-10, 21-13 സ്കോറിനു പരാജയപ്പെടുത്തിയാണ് വനിതാ സിംഗ്ള്‍സില്‍ ഇന്ത്യ കിരീടം സ്വന്തമാക്കിയത്. സൗത് ഏഷ്യന്‍ ഗെയിംസില്‍ ജേതാവായ ഋത്വികയുടെ ഈ വര്‍ഷത്തെ രണ്ടാം കിരീട നേട്ടമാണിത്. മിക്സഡ് ഡബ്ള്‍സില്‍ റഷ്യയുടെതന്നെ വ്ളാദിമിര്‍ ഇവാനോവ്-വലേറിയ സൊറേകിന സഖ്യത്തെ 21-17, 21-19 സ്കോറിനു കീഴ്പ്പെടുത്തി ഇന്ത്യയുടെ സിക്കി റെഡ്ഡി-പ്രണാബ് ചോപ്ര സഖ്യം ജേതാക്കളായി. എന്നാല്‍, പുരുഷ സിംഗ്ള്‍സിലെ സിറില്‍ വെര്‍മയുടെ തോല്‍വി ഇന്ത്യക്ക് ആഘാതമായി. 16-21, 10-21 സ്കോറിനാണ് മലേഷ്യയുടെ സുല്‍ഫാദി സുല്‍ഫിക്കിയോട് സിറില്‍ അടിയറവ് പറഞ്ഞത്.