ദേശീയ സൈക്ലിങ് ചാമ്പ്യന്‍ഷിപ്: കേരളം കിരീടത്തിലേക്ക്

തിരുവനന്തപുരം: 69ാം ദേശീയ ട്രാക് സൈക്ളിങ് ചാമ്പ്യന്‍ഷിപ്പിന് ഇന്ന് തിരശ്ശീലവീഴാനിരിക്കേ കേരളം കിരീടത്തിലേക്ക് ചവിട്ടിക്കയറുന്നു. ഒരുസ്വര്‍ണവും രണ്ട് വെള്ളിയും ഒരുവെങ്കലവുമാണ് ശനിയാഴ്ച കേരളം നേടിയത്. ഇതോടെ ആറ് സ്വര്‍ണവും ഏഴ് വെള്ളിയും മൂന്ന് വെങ്കലവുമടക്കം 62 പോയന്‍റുമായി കേരളം കുതിപ്പുതുടരുകയാണ്. 40 പോയന്‍റുമായി കര്‍ണാടക രണ്ടാംസ്ഥാനത്തും 32 പോയന്‍റുമായി മണിപ്പൂര്‍ മൂന്നാമതുമാണ്.

മുതിര്‍ന്ന പെണ്‍കുട്ടികളുടെ 4000 മീറ്റര്‍ ടീം പെര്‍സ്യൂട്ടില്‍ കേരളത്തിന്‍െറ സയനോര, അമൃത, കെസിയ, രജനി എന്നിവരടങ്ങിയ സംഘമാണ് സ്വര്‍ണം നേടിയത്. 18 വയസ്സില്‍ താഴെ പ്രായമുള്ള പെണ്‍കുട്ടികളുടെ 4000 മീറ്റര്‍ ടീം പെര്‍സ്യൂട്ടില്‍ അമൃത, നിചിതലാല്‍, ജി.എസ്. വിദ്യ, ഷഹാന എന്നിവരടങ്ങുന്ന ടീമിനാണ് വെള്ളി. സ്പ്രിന്‍റില്‍ കേരളത്തിന്‍െറ കെസിയ വര്‍ഗീസ് വെള്ളി നേടിയപ്പോള്‍ 18 വയസ്സിന് താഴെയുള്ളവരുടെ മത്സരത്തില്‍ സ്വര്‍ണപ്രതീക്ഷയായിരുന്ന നയനയുടെ പ്രകടനം വെങ്കലത്തില്‍ ഒതുങ്ങി.