ദേശീയ ട്രാക്ക് സൈക്ളിങ് ചാമ്പ്യന്‍ഷിപ്: കേരളം മുന്നേറ്റം തുടങ്ങി

തിരുവനന്തപുരം: 69ാമത് ദേശീയ ട്രാക്ക് സൈക്ളിങ് ചാമ്പ്യന്‍ഷിപ്പിന് കാര്യവട്ടം എല്‍.എന്‍.സി.പി.ഇ വെലോഡ്രോമില്‍ തുടക്കമായി. ആദ്യദിവസം എട്ടിനങ്ങളിലെ മത്സരങ്ങള്‍ പൂര്‍ത്തിയായപ്പോള്‍ 23 പോയന്‍റുമായി കേരളം മുന്നേറ്റം തുടങ്ങി. 22 പോയന്‍റുമായി മണിപ്പൂര്‍ തൊട്ടുപിറകിലുണ്ട്. ഏഴു പോയന്‍റ് നേടിയ അന്തമാന്‍-നികോബാറാണ് മൂന്നാം സ്ഥാനത്ത്. കേരളത്തിനുവേണ്ടി യു.എസ്.

അഭിജിത്തും (10 കിലോമീറ്റര്‍ സ്ക്രാച്ച്-അണ്ടര്‍ 18 ആണ്‍.), ലിഡിയമോള്‍ എം.സണ്ണിയും (10 കിലോമീറ്റര്‍ സ്ക്രാച്ച്-പെണ്‍.), അലീന റെജിയുമാണ് (ആറ് കി.മീ സ്ക്രാച്ച്-അണ്ടര്‍ 18 പെണ്‍.) സ്വര്‍ണം നേടിയത്. എ. അനന്തുവും (10 കി.മീ.സ്ക്രാച്ച്-അണ്ടര്‍ 18 ആണ്‍. ), വി. രജനിയും (10 കി.മീ സ്ക്രാച്ച്-പെണ്‍.) വെള്ളിയും സ്വന്തമാക്കി. ജി.എസ്. വിദ്യക്കാണ് (ആറ് കി.മീ സ്ക്രാച്ച്-അണ്ടര്‍ 18 പെണ്‍.) വെങ്കലം .

24 സംസ്ഥാനങ്ങളില്‍നിന്നുള്ള 500ല്‍പരം കായികതാരങ്ങള്‍ മത്സരങ്ങളില്‍ പങ്കെടുക്കുന്നുണ്ട്. തിരുവനന്തപുരം മേയര്‍ അഡ്വ. വി.കെ. പ്രശാന്ത് ഉദ്ഘാടനം ചെയ്തു. കേരള സൈക്ളിങ് അസോസിയേഷന്‍ പ്രസിഡന്‍റ് അഡ്വ. വി.കെ. ഹരികുമാര്‍ അധ്യക്ഷതവഹിച്ചു. സ്പോര്‍ട്സ് കൗണ്‍സില്‍ സെക്രട്ടറി സഞ്ജയന്‍ കുമാര്‍ മുഖ്യപ്രഭാഷണം നടത്തി. മീറ്റ് 25ന് സമാപിക്കും.