ഷോട്ട്പുട്ടിൽ തേജീന്ദർ പാലിന് ഗെയിംസ് റെക്കോർഡോടെ സ്വർണം 

ജക്കാർത്ത: ഏഷ്യന്‍ ഗെയിംസ് പുരുഷന്മാരുടെ ഷോട്ട്പുട്ടിൽ ഇന്ത്യയുടെ തേ​ജീ​ന്ദ​ർ പാ​ൽ സിങ്ങിന് സ്വർണം. ഗെയിംസ് റെക്കോർഡോടെ ആണ് തേജീന്ദർപാൽ സ്വർണ മെഡൽ നേടിയത്. 

മൽസരത്തിലെ അഞ്ചാമത്തെ ശ്രമത്തിൽ 20.75 മീറ്ററാണ് തേ​ജീ​ന്ദ​ർ പാ​ൽ മാർക്ക് ചെയ്തത്. ഒാം പ്രകാശ് കർഹാനയുടെ ആറു വർഷം പഴക്കമുള്ള റെക്കോഡ് ആണ് തേ​ജീ​ന്ദ​ർ പാ​ൽ തകർത്തത്. ഒന്നാം ശ്രമം-19.96, രണ്ടാം ശ്രമം-19.15, മൂന്നാം ശ്രമം-പരാജയം, നാലാം ശ്രമം-19.96, അഞ്ചാം ശ്രമം-20.75, ആറാം ശ്രമം-20.00 എന്നിങ്ങനെയാണ് തേ​ജീ​ന്ദ​ർ മാർക്ക് ചെയ്തത്.

ചൈനയുടെ ലിയു യാങ് (19.52 മീറ്റർ -മൂന്നാം ശ്രമം) വെള്ളിയും കസാകിസ്താന്‍റെ ഇവാൻ ഇവാനോവ് (19.40 മീറ്റർ-മൂന്നാം ശ്രമം) വെങ്കലവും നേടി. 

23കാരനായ തേ​ജീ​ന്ദ​ർ പാ​ൽ സിങ് ഭുവനേശ്വറിൽ നടന്ന ഏഷ്യൻ ചാമ്പ്യൻഷിപ്പിൽ വെള്ളി മെഡൽ നേടിയിരുന്നു. 2018ൽ ആസ്ട്രേലിയയിൽ നടന്ന കോമൺവെൽത്ത് ഗെയിംസിൽ തേ​ജീ​ന്ദ​ർ പാ​ൽ എട്ടാം സ്ഥാനത്തെത്തിയിട്ടുണ്ട്. 

2002ലാണ് ഇന്ത്യൻ താരം ബഹാദുർ സിങ്ങാണ് ഷോട്ട്പുട്ട് ഇനത്തിൽ ആദ്യ മെഡൽ നേടുന്നത്. ഷോട്ട്പുട്ടിലെ നേട്ടത്തോടെ ഗെയിംസിൽ ഇന്ത്യ നേടിയ സ്വർണ മെഡലുകളുടെ എണ്ണം ഏഴായി. അഞ്ച് വെള്ളിയും 17 വെങ്കലവും അടക്കം ആകെ 29 മെഡലുകളുണ്ട്.