ലോക സ്കൂള്‍ അത്ലറ്റിക്സ്: അജിത്തിന് വെള്ളി

ട്രാബ്സോണ്‍: കരിമ്പനക്കരുത്തുമായി മലയാളിതാരം പി.എന്‍. അജിത്തിന് ലോക സ്കൂള്‍ അത്ലറ്റിക്സില്‍ ആണ്‍കുട്ടികളുടെ 3000 മീറ്ററില്‍ വെള്ളി. ദേശീയ റെക്കോഡ് തിരുത്തിയ പ്രകടനത്തോടെയാണ് പാലക്കാട് പറളി ഹയര്‍ സെക്കന്‍ഡറിയിലെ പ്ളസ് വണ്‍ വിദ്യാര്‍ഥിയായ അജിത് കുതിച്ചത്. എട്ട് മിനിറ്റ് 41.08 സെക്കന്‍ഡിലാണ് അജിത് മൊറോക്കോയുടെ റാജി ഇല്യാസിന് പിന്നില്‍ രണ്ടാമനായത്. ദേശീയ, സംസ്ഥാന സ്കൂള്‍ മീറ്റുകളില്‍ വ്യക്തിഗത ജേതാവായിരുന്ന അജിത്ത് പ്രശസ്തനായ പി.ജി. മനോജിന്‍െറ ശിഷ്യനാണ്. മുഹമ്മദ് അഫ്സലിന് ശേഷം പറളിയില്‍നിന്ന് ഉയര്‍ന്നുവന്ന ശ്രദ്ധേയതാരമായ അജിത് ഹംഗറിയില്‍ നടന്ന ലോക സ്കൂള്‍ ക്രോസ്കണ്‍ട്രിയിലും പങ്കെടുത്തിട്ടുണ്ട്. പറളി തേനൂര്‍ ടാപ്പിങ് തൊഴിലാളിയായ നാരായണന്‍ കുട്ടിയുടെയും ജയന്തിയുടെയും മകനാണ്. അഭിമാനാര്‍ഹമായ നേട്ടമാണിതെന്നും ട്രാക്കിലിറങ്ങിയാല്‍ തികഞ്ഞ ആത്മാര്‍ഥതയോടെ കുതിക്കുന്ന താരമാണ് തന്‍െറ ശിഷ്യനെന്നും കോച്ച് മനോജ് പറഞ്ഞു.
ആണ്‍കുട്ടികളുടെ 800 മീറ്ററില്‍ അഭിഷേക് മാത്യു നേരിയ വ്യത്യാസത്തില്‍ നാലാംസ്ഥാനത്തേക്ക് പിന്തള്ളപ്പെട്ടു. പെണ്‍കുട്ടികളുടെ ലോങ്ജംപില്‍ മലയാളിതാരമായ രുഗ്മ ഉദയന്‍ ആറാം സ്ഥാനം നേടി.

100 മീറ്റര്‍ ഹര്‍ഡ്ല്‍സില്‍ അപര്‍ണ റോയി അവസാന സ്ഥാനത്തായി. ആണ്‍കുട്ടികളുടെ ജാവലിന്‍ത്രോയില്‍ ഇന്ത്യയുടെ രോഹിത് യാദവ് സ്വര്‍ണം നേടി. സ്കൂള്‍ താരങ്ങളുടെ ഒളിമ്പിക്സായ ജിംനേഷ്യാഡിന്‍െറ ഭാഗമായാണ് അത്ലറ്റിക്സ് നടക്കുന്നത്.