റിലേയില്‍ മലയാളിപ്പട ഇന്ന് ട്രാക്കില്‍

റിയോ: ഒളിമ്പിക്സ് ട്രാക്കിലെ അവസാന പോരാട്ടങ്ങള്‍ക്കായി ഇന്ത്യ ഇറങ്ങുന്നു. മലയാളികളടങ്ങിയ പുരുഷ-വനിതാ 4x400 മീറ്റര്‍ റിലേ ടീമുകള്‍ ശനിയാഴ്ച പുലര്‍ച്ചെ ഇന്ത്യന്‍ സമയം 5.10നും, 5.40നുമായി ട്രാക്കിലിറങ്ങും. സീസണിലെ ഏറ്റവും മികച്ച മൂന്നാമത്തെ സമയവുമായാണ് പുരുഷ സംഘം റിയോയില്‍ മത്സരിക്കുന്നത്. കുഞ്ഞുമുഹമ്മദ്, ആരോക്യ രാജീവ്, മുഹമ്മദ് അനസ്, ധരുണ്‍ അയ്യസ്സാമി എന്നിവരടങ്ങിയ ടീമാണ് ഇന്ത്യക്കായി ബാറ്റണേന്തുന്നത്. 3 മിനിറ്റ് 00.91 സെക്കന്‍ഡില്‍ ദേശീയ റെക്കോഡ് പ്രകടനത്തോടെയായിരുന്നു ഒളിമ്പിക്സ് യോഗ്യത ഉറപ്പാക്കിയത്. ബംഗളൂരുവില്‍ നടന്ന മൂന്നാമത് ഇന്ത്യന്‍ ഗ്രാന്‍ഡ്പ്രീയിലായിരുന്നു ഈ പ്രകടനം.

വനിതാ വിഭാഗത്തില്‍ മലയാളി താരങ്ങളായ ജിസ്ന മാത്യൂ, അനില്‍ഡ തോമസ്, എം.ആര്‍ പൂവമ്മ, അശ്വിനി അക്കുഞ്ചി എന്നിവരാണ് മത്സരിക്കുന്നത്.
ഇന്ത്യയുടെ നടത്തക്കാരും ഇന്നിറങ്ങും. പുരുഷ വിഭാഗം 50 കി.മീറ്ററില്‍ സന്ദീപ് കുമാറും വനിതാ വിഭാഗം 20 കി.മീറ്ററില്‍ കുശ്ബീര്‍ കൗര്‍, സപ്ന പൂനിയ എന്നിവരും ഇറങ്ങും.