വെസ്​റ്റാപ്പാന്​ ഫോർമുല വൺ കിരീടം നേടിക്കൊടുത്ത അവസാന ലാപ്പ്​ ഫിനിഷ്​ കാണാം

ദുബൈ: അബൂദബി ഗ്രാൻഡ്​പ്രീയുടെ അവസാന ലാപ്പിൽ മെഴ്​സിഡസിന്‍റെ ലൂയിസ്​ ഹാമിൽട്ടണിനെ മറികടന്നാണ്​ ത്രില്ലിങ്​ ഫിനിഷിലൂടെ ഡച്ച്​ താരം മാക്​സ്​ വെസ്​റ്റാപ്പൻ കന്നി ഫോർമുല വൺ കിരീടം സ്വന്തമാക്കിയത്​​.

അബൂദബി ഗ്രാൻഡ്​പ്രീ വേദിയായ യാസ്​ മറീന സർക്യൂട്ടിൽ തുടക്കം മുതൽ മുന്നിലോടിയ ഹാമിൽട്ടൺ ആദ്യ ലാപ്പിൽ വെസ്​റ്റാപ്പനെ പിന്നിലാക്കിയിരുന്നെങ്കിലും അവസാനം വരെ വിടാതെ പിന്തുടർന്ന്​ റെഡ്​ബുളി​െൻറ ഡച്ച്​ ഡ്രൈവർ അവസാനം ജയം പിടിക്കുകയായിരുന്നു. എട്ടാം ഫോർമുല വൺ കിരീടം നേടി മൈക്കൽ ഷൂമാക്കറിനെ മറികടക്കാമെന്ന ഹാമിൽട്ടണിന്‍റെ മോഹമാണ്​ വെസ്​റ്റാപ്പൻ പൊലിച്ചത്​. ഹാമിൽട്ടണിനെ 58ാം ലാപ്പിൽ വെസ്​റ്റാപ്പൻ മറികടക്കുന്ന വിഡിയോ കാണാം.

369.5 വീതം പോയിന്‍റുമായായിരുന്നു ഇരുവരും അബൂദബിയിലെത്തിയത്​. പോൾ പൊസിഷനിൽ മത്സരം തുടങ്ങിയത്​ വെസ്റ്റാപ്പനായിരുന്നെങ്കിലും ഹാമിൽട്ടൺ ലീഡ്​ പിടിച്ചു. 53ാം ലാപ്പിൽ വില്യംസിന്‍റെ നികോളസ്​ ലത്തീഫിയുടെ കാർ ഇടിച്ചുതകർന്നത്​ മത്സരഫലം നിർണയിച്ചുവെന്ന്​ പറയാം. ആ ലാപ്പിൽ സർക്യൂട്ടിൽ ഇറങ്ങിയ സേഫ്​റ്റി കാർ കളംവിട്ടപ്പോൾ ഇരുതാരങ്ങളും തമ്മിലുള്ള അകലം വളരെ കുറഞ്ഞു. പുതിയ ടയറിന്‍റെ ആനുകൂല്യത്തിൽ കുതിച്ചുകയറിയ വെസ്റ്റാപ്പൻ അവസാന ലാപ്പിൽ വിജയം എത്തിപ്പിടിച്ചു.

അവസാന ലാപ്പിൽ ചട്ടലംഘനത്തിലൂടെയാണ്​ വെസ്റ്റാപ്പൻ വിജയിച്ചതെന്ന്​ കാണിച്ച്​ മെഴ്​സിഡസ്​ പരാതി ഉയർത്തിയിട്ടുണ്ട്​. സേഫ്​റ്റി കാറിന്‍റെ ഇടപെടലാണവർ ചുണ്ടിക്കാണിക്കുന്നത്​. സീസണിൽ 22 ഗ്രാൻപ്രീകളിൽ 10 എണ്ണം സ്വന്തമാക്കിയാണ്​ ഡച്ചുകാരന്‍റെ കിരീടധാരണം.