പാരലിമ്പിക്​സിൽ മെഡൽ നേടുന്ന ആദ്യ ഐ.എ.എസ്​ ഓഫിസറായി സുഹാസ്​ യതിരാജ്​

ടോക്യേ: പാരലിമ്പിക്​സ്​ പുരുഷ വിഭാഗം ബാഡ്​മിന്‍റൺ എസ്​.എൽ 4 വിഭാഗത്തിൽ ഇന്ത്യയുടെ സുഹാസ്​ യതിരാജിന്​ വെള്ളി. ഞായറാഴ്ച നടന്നഫൈനലിൽ ടോപ്​ സീഡായ ഫ്രാൻസിന്‍റെ ലൂകാസ്​ മസൂറിനോട്​ 21-15, 17-21, 15-21നായിരുന്നു യതിരാജിന്‍റെ തോൽവി. ടോക്യോ പാരലിമ്പിക്​സിലെ ഇന്ത്യയുടെ 18ാം മെഡൽനേട്ടമാണിത്​.

നോയ്​ഡ ഡിസ്​ട്രിക്​ മജിസ്​ട്രേറ്റ്​ കൂടിയായ 38കാരൻ രണ്ടുതവണ ലോകജേതാവായ ഫ്രഞ്ച്​ എതിരാളിയോട്​ 62 മിനിറ്റ്​ സമയം പോരാടിയാണ്​ അടിയറവ്​ പറഞ്ഞത്​. യൂറോപ്യൻ ചാമ്പ്യൻഷിപ്പിൽ മൂന്ന്​ തവണ സ്വർണം നേടിയ മസൂറിനെതിരെ ഗ്രൂപ്​ ഘട്ടത്തിലും തോറ്റിരുന്നു​​ങ്കെിലും ഫൈനലിൽ യതിരാജ്​ അസാമാന്യ പ്രകടനമാണ്​ പുറത്തെടുത്തത്​.

ഗൗതം ബുദ്ധ നഗർ (നോയ്​ഡ) ജില്ല മജിസ്​ട്രേറ്റായ സുഹാസ്​​ പാരലിമ്പിക്​സിൽ മെഡൽ നേടുന്ന ആദ്യ ഐ.എ.എസ്​ ഓഫിസറായി. ഇന്തോനേഷ്യയുടെ ഫ്രെഡി സെറ്റ്യാവനിനെയായിരുന്നു സെമിയിൽ തോൽപിച്ചത്​.

2017 ബി.ഡബ്ല്യു.എഫ്​ ടർക്കിഷ്​ ബാഡ്​മിന്‍റൺ ചാമ്പ്യൻഷിപിന്‍റെ പുരുഷ വിഭാഗം സിംഗിൾസിലും ഡബിൾസിലും സുഹാസ്​ സ്വർണം നേടിയിരുന്നു. 2016 ഏഷ്യ ചാമ്പ്യൻഷിപ്പിൽ സ്വർണവും 2018 ഏഷ്യൻ പാരഗെയിംസിൽ വെങ്കലവും സ്വന്തമാക്കി. എസ്​.എച്ച്​ 6 ക്ലാസ്​ ഫൈനലിൽ കൃഷ്​ണ നഗർ ഫൈനലിൽ എത്തിയതോടെ ഇന്ത്യക്ക്​ ഒരുമെഡൽ കൂടി ഉറപ്പായി.