ഒളിമ്പിക്​സിന്​ പോകുന്ന ബ്രിട്ടീഷ്​ സംഘത്തിനൊപ്പം ഇവ കൂടിയുണ്ട്​- ഞെട്ടരുത്​!

ലണ്ടൻ: ഒരു വർഷം വൈകിയാണെങ്കിലും ടോകിയോ ഒളിമ്പിക്​സിന്​ മാസങ്ങൾ ബാക്കിനിൽക്കെ സ്വർണവും വെള്ളിയും വാരിക്കൂട്ടാൻ കുന്നോളം സ്വപ്​നങ്ങളുമായി വിമാനം കയറാൻ ഒരുങ്ങിനിൽക്കുന്ന ബ്രിട്ടീഷ്​ സംഘത്തിന്​ അകമ്പടി വസ്​തുക്കളുടെ പട്ടിക ഏറെ വലുത്​. 45,000 ടീ ബാഗുകൾ, 7,000 ക്രിസ്​പ്​ ബാഗുകൾ, 8,000 കഞ്ഞിക്കലങ്ങൾ... എന്നിങ്ങനെ പോകും പട്ടിക.

ഒളിമ്പിക്​ ഗ്രാമം ചുറ്റിയടിക്കാൻ കുഞ്ഞു സൈക്കിളുകൾ 50 ലേറെയുണ്ട്​. ലക്ഷ്യത്തിൽ എളുപ്പം എത്താമെന്നു മാത്രമല്ല, കാലുകൾക്ക്​ വ്യായാമം കൂടി ഇവ നൽകുമെന്നാണ്​ കണക്കുകൂട്ടൽ. വെറുതെയിരുന്ന്​ കളിച്ചോണ്ടിരിക്കാൻ കണക്​റ്റ്​ 4, ജെംഗ, ഡോബ്​ൾ തുടങ്ങിയ ഗെയിം പാക്കുകളുമുണ്ട്​. ടീം സ്​പോൺസർമാരായ ആൽഡി ആന്‍റ്​ ഡ്രീംസ്​ വകയായാണ്​ ഇവ ജപ്പാനിലെത്തുന്നത്​. കഴിഞ്ഞ ഫെബ്രുവരിയിൽ തന്നെ ഇവ ഒരു ചരക്കു കപ്പലിൽ കയറ്റി കഴിഞ്ഞതായി റിപ്പോർട്ടുകൾ പറയുന്നു.

ജൂലൈ പകുതിയോടെയാണ്​ ഒളിമ്പിക്​സ്​ ആരംഭിക്കുക.

ബോക്​സിങ്​ ബാഗുകൾ, ജൂഡോ മാറ്റുകൾ, 1000 കിടക്ക വിരികൾ, തലയിണകൾ, തലയിണക്കവറുകൾ, പുതപ്പുകൾ എന്നിവയെല്ലാമുണ്ട്​. യാത്ര പുറപ്പെട്ട്​ 55 ദിവസം കഴിഞ്ഞ്​ കപ്പൽ ടോകിയോയിലെത്തും.

ചരിത്രത്തിലാദ്യമായി പുരുഷന്മാരെക്കാൾ വനിത താരങ്ങൾ കൂടുതലുള്ളതാണ്​ ഇത്തവണ 370 അംഗ ബ്രിട്ടീഷ്​ സംഘം.

കോവിഡിന്‍റെ സാഹചര്യത്തിൽ ആരോഗ്യ സുരക്ഷക്കും കർശനമായ മാനദണ്​ഡങ്ങളാണ്​ ബ്രിട്ടീഷ്​ സംഘം സ്വീകരിക്കുക.