ഏഷ്യ കപ്പ് ഹോക്കി: ഫൈനൽ തേടി ഇന്ത്യ ഇന്ന് കൊറിയക്കെതിരെ

ജകാർത്ത: ഏഷ്യ കപ്പ് ഹോക്കി ടൂർണമെന്‍റ് ഫൈനലിൽ ഇടം പിടിക്കാനൊരുങ്ങി ഇന്ത്യ. ചൊവ്വാഴ്ച നടക്കുന്ന സൂപ്പർ ഫോർ അവസാന മത്സരത്തിൽ ദക്ഷിണ കൊറിയയാണ് എതിരാളികൾ. ജപ്പാനുമായുള്ള ആദ്യകളിയിൽ 2-1 ജയിച്ച ഇന്ത്യ മലേഷ്യയുമായി രണ്ടാം മത്സരത്തിൽ 3-3ന് സമനിലയിൽ കുരുങ്ങിയിരുന്നു.

നാല് വീതം പോയന്റാണെങ്കിലും രണ്ട് ഗോൾ വ്യത്യാസത്തിൽ ദക്ഷിണകൊറിയ പട്ടികയിൽ മുന്നിലും ഇന്ത്യ രണ്ടാമതുമാണ്. കൊറിയക്കെതിരെ ജയിച്ചാൽ ഇന്ത്യക്ക് അനായാസം ഫൈനലിലെത്താം. അല്ലാത്ത പക്ഷം മറ്റു മത്സര ഫലങ്ങളെ ആശ്രയിക്കേണ്ടിവരും. ആദ്യ രണ്ട് സ്ഥാനക്കാർക്കാണ് ഫൈനൽ യോഗ്യത.