ഏഷ്യൻ അത്‍ലറ്റിക്സ് ചാമ്പ്യൻഷിപ്പ്: മലയാളി താരം അബ്ദുല്ല അബൂബക്കറിന് സ്വർണം

ബാ​ങ്കോ​ക്ക്: ഏ​ഷ്യ​ൻ അ​ത് ല​റ്റി​ക് ചാ​മ്പ്യ​ൻ​ഷി​പ്പി​ന്റെ ര​ണ്ടാം ദി​നം നേ​ട്ടം കൊ​യ്ത് ഇ​ന്ത്യ. മൂ​ന്നു സ്വ​ർ​ണ​വും ര​ണ്ട് വെ​ങ്ക​ല​വും വ്യാ​ഴാ​ഴ്ച ല​ഭി​ച്ചു. വ​നി​ത​ക​ളു​ടെ 100 മീ​റ്റ​ർ ഹ​ർ​ഡ്ൽ​സി​ൽ ജ്യോ​തി യാ​രാ​ജി​യാ​ണ് സ്വ​ർ​ണ മെ​ഡ​ൽ അ​ക്കൗ​ണ്ട് തു​റ​ന്ന​ത്. തു​ട​ർ​ന്ന് പു​രു​ഷ​ന്മാ​രു​ടെ 1500 മീ​റ്റ​റി​ൽ അ​ജ​യ്കു​മാ​ർ സ​രോ​ജും ട്രി​പ്ൾ ജം​പി​ൽ മ​ല​യാ​ളി താ​രം അ​ബ്ദു​ല്ല അ​ബൂ​ബ​ക്ക​റും ജേ​താ​ക്ക​ളാ​യി. ഡെ​ക്കാ​ത്ത​ല​ണി​ൽ തേ​ജ​ശ്വി​ൻ ശ​ങ്ക​റും വ​നി​ത 400 മീ​റ്റ​റി​ൽ ഐ​ശ്വ​ര്യ മി​ശ്ര​യും വെ​ങ്ക​ലം നേ​ടി. ആ​കെ മൂ​ന്നു വീ​തം സ്വ​ർ​ണ​വും വെ​ങ്ക​ല​വു​മാ​യി ജ​പ്പാ​നും ചൈ​ന​ക്കും പി​ന്നി​ൽ മൂ​ന്നാ​മ​താ​ണ് ഇ​ന്ത്യ.

ചാ​ടി​ച്ചാ​ടി​ച്ചാ​ടി അ​ബ്ദു​ല്ല നേ​ടി

സീ​സ​ണി​ലെ മി​ക​ച്ച പ്ര​ക​ട​ന​മാ​യ 16.92 മീ​റ്റ​ർ ചാ​ടി​യാ​ണ് കോ​ഴി​ക്കോ​ട് നാ​ദാ​പു​രം സ്വ​ദേ​ശി അ​ബ്ദു​ല്ല അ​ബൂ​ബ​ക്ക​ർ ട്രി​പ്ൾ ജം​പ് സ്വ​ർ​ണ​ത്തി​ലെ​ത്തി​യ​ത്. ജ​പ്പാ​ന്റെ ഹി​കാ​റു ഇ​കെ​ഹാ​ത (16.73) വെ​ള്ളി​യും ദ​ക്ഷി​ണ കൊ​റി​യ​യു​ടെ കിം ​ജാ​ങ് വു (16.59) ​വെ​ങ്ക​ല​വും കൈ​ക്ക​ലാ​ക്കി. ക​ഴി​ഞ്ഞ വ​ർ​ഷം ന​ട​ന്ന കോ​മ​ൺ​വെ​ൽ​ത്ത് ഗെ​യിം​സി​ൽ സ​ഹ​താ​രം എ​ൽ​ദോ​സ് പോ​ളി​ന് പി​ന്നി​ൽ ര​ണ്ടാ​മ​നാ​യി വെ​ള്ളി നേ​ടി​യി​രു​ന്നു അ​ബ്ദു​ല്ല. എ​ൽ​ദോ​സി​ന്റെ​യും പ്ര​വീ​ൺ ചി​ത്ര​വേ​ലി​ന്റെ​യും അ​സാ​ന്നി​ധ്യ​ത്തി​ൽ ഇ​ന്ത്യ​യു​ടെ പ്ര​തീ​ക്ഷ​ക​ള​ത്ര​യും മ​ല​യാ​ളി​താ​ര​ത്തി​ലാ​യി​രു​ന്നു.

2017ലെ ​ഏ​ഷ്യ​ൻ അ​ത് ല​റ്റി​ക് ചാ​മ്പ്യ​ൻ​ഷി​പ്പി​ൽ സ്വ​ർ​ണ​വും 2019ൽ ​വെ​ള്ളി​യും ക​ര​സ്ഥ​മാ​ക്കി​യ ഉ​ത്ത​ർ​പ്ര​ദേ​ശു​കാ​ര​ൻ അ​ജ​യ്കു​മാ​ർ സ​രോ​ജ് ഇ​ക്കു​റി ഒ​ന്നാം സ്ഥാ​നം തി​രി​ച്ചു​പി​ടി​ച്ചു. 1500 മീ​റ്റ​ർ മൂ​ന്നു മി​നി​റ്റ് 41.51 സെ​ക്ക​ൻ​ഡി​ലാ​ണ് പൂ​ർ​ത്തി​യാ​ക്കി​യ​ത്. ഈ ​ഇ​ന​ത്തി​ലെ മ​റ്റൊ​രു പ്ര​തീ​ക്ഷ​യാ​യി​രു​ന്ന മ​ല​യാ​ളി താ​രം ജി​ൻ​സ​ൺ ജോ​ൺ​സ​ണി​ന് മെ​ഡ​ലി​ല്ല. പു​രു​ഷ​ന്മാ​രു​ടെ 400 മീ​റ്റ​ർ ഫൈ​ന​ലി​ൽ മ​ത്സ​രി​ച്ച കേ​ര​ളീ​യ​ൻ മു​ഹ​മ്മ​ദ് അ​ജ്മ​ൽ നാ​ലാം സ്ഥാ​ന​ത്താ​യി.

പൊ​ന്നാ​യി ജ്യോ​തി വ​ന്നു

സ്വ​ന്തം പേ​രി​ലെ ദേ​ശീ​യ റെ​ക്കോ​ഡ് പ​ല​വ​ട്ടം തി​രു​ത്തി​യ ജ്യോ​തി​യാ​ണ് മ​ഴ​യി​ൽ ന​ന​ഞ്ഞ സു​പാ​ച​ലാ​സാ​യി സ്റ്റേ​ഡി​യ​ത്തി​ലെ ട്രാ​ക്കി​ൽ ഇ​ന്ത്യ​യു​ടെ സ്വ​ർ​ണ​ക്കൊ​യ്ത്ത് തു​ട​ങ്ങി​യ​ത്. 100 മീ​റ്റ​ർ ഹ​ർ​ഡ്ൽ​സി​ൽ ശ​ക്ത​മാ​യി ഭീ​ഷ​ണി​യു​യ​ർ​ത്തി​യ ജാ​പ്പ​നീ​സ് താ​ര​ങ്ങ​ളു​ടെ വെ​ല്ലു​വി​ളി മ​റി​ക​ട​ന്ന് ആ​ന്ധ്ര​പ്ര​ദേ​ശ് വി​ശാ​ഖ​പ​ട്ട​ണം സ്വ​ദേ​ശി​നി 13.09 സെ​ക്ക​ൻ​ഡി​ൽ ഫി​നി​ഷ് ചെ​യ്തു. ജ​പ്പാ​ന്റെ അ​സൂ​ക ടെ​രാ​ഡ (13.13) വെ​ള്ളി‍യും മ​സൂ​മി ആ​വോ​കി (13.13) വെ​ങ്ക​ല​വും നേ​ടി. മ​റ്റൊ​രു ഇ​ന്ത്യ​ൻ താ​രം നി​ത്യ രാം​രാ​ജ് നാ​ലാ​മ​താ​യി. ജ്യോ​തി​യു​ടെ ദേ​ശീ​യ റെ​ക്കോ​ഡ് പ്ര​ക​ട​നം 12.82 സെ​ക്ക​ൻ​ഡാ​ണ്. വ​നി​ത 400 മീ​റ്റ​ർ ഫൈ​ന​ലി​ൽ 53.07 സെ​ക്ക​ൻ​ഡി​ൽ ഓ​ടി​യെ​ത്തി​യാ​ണ് ഐ​ശ്വ​ര്യ മി​ശ്ര വെ​ങ്ക​ലം നേ​ടി​യ​ത്. ശ്രീ​ല​ങ്ക​യു​ടെ രാ​മ​നാ​യ​ക ന​ദീ​ഷ​ക്ക് സ്വ​ർ​ണ​വും ഉ​സ്ബെ​കി​സ്താ​ന്റെ ഫ​രീ​ദ സോ​ലീ​വ​ക്ക് വെ​ള്ളി​യും ല​ഭി​ച്ചു. ഡെ​ക്കാ​ത്ത​ല​ണി​ൽ ആ​ദ്യദി​നം മു​ന്നി​ലാ​യി​രു​ന്ന തേ​ജ​ശ്വി​നെ (7527) മൂ​ന്നാ​മ​താ​ക്കി ജ​പ്പാ​ന്റെ യു​മ മ​റു​യാ​മ സ്വ​ർ​ണ​വും താ​യ്‍ല​ൻ​ഡി​ന്റെ സു​ത്തി​സാ​ക് സി​ങ്കോ​ൺ വെ​ള്ളി‍യും സ്വ​ന്ത​മാ​ക്കി.