ഹോക്കി താരം വന്ദന കതാരിയ ഉത്തരാഖണ്ഡ്​ വനിത ശി​ശു വികസന, ശാക്തീകരണ വകുപ്പിന്‍റെ ബ്രാൻഡ്​ അംബാസിഡർ

ഡെറാഡൂൺ: ഇന്ത്യൻ ഹോക്കി താരം വന്ദന കതാരിയ ഇനി ഉത്തരാഖണ്ഡ്​ വനിത ശി​ശു വികസന, ശാക്തീകരണ വകുപ്പിന്‍റെ ബ്രാൻഡ്​ അംബാസിഡർ. ഉത്തരാഖണ്ഡ്​ മുഖ്യമന്ത്രി പുഷ്​കർ സിങ്​ ധാമി അറിയിച്ചതാണ്​ ഇക്കാര്യം.

ഒളിമ്പിക്​ സെമി ഫൈനലിൽ തോൽവി നേരിട്ടതിന്​ പിന്നാലെ വന്ദനക്കും കുടുംബത്തിനും നേരെ വൻതോതിൽ ജാതിയധിക്ഷേപം ​ഉയർന്നിരുന്നു. ഹരിദ്വാറിലെ റോഷൻബാദിലെ വീട്ടിന്​ സമീപം സവർണ ജാതിയിൽപ്പെട്ട രണ്ടുപേർ പടക്കംപൊട്ടിച്ച്​ തോൽവി ആഘോഷിക്കുകയും അധിക്ഷേപിക്കുകയുമായിരുന്നു. ദലിത്​ താരങ്ങൾ ഇന്ത്യയിലുള്ളതിനാലാണ്​ ഇന്ത്യ തോറ്റതെന്ന്​ അവർ ആരോപിച്ചതായും വന്ദനയ​ുടെ കുടുംബാംഗങ്ങൾ പറഞ്ഞിരുന്നു. സെമി ഫൈനലിൽ അർജന്‍റീനയോട്​ ഇന്ത്യ തോൽക്കുകയായിരുന്നു.

നേര​േത്ത, ഉത്തരാഖണ്ഡ്​ കായിക മന്ത്രി അരവിന്ദ്​ പാണ്ഡെ വന്ദനയുടെ വീട്​ സന്ദർശിക്കുകയും മികച്ച ഭാവി ആശംസിക്കുകയും ചെയ്​തിരുന്നു. യുവജനങ്ങൾക്ക്​ മാതൃകയാണ്​ വന്ദ​നയെന്നും എല്ലാവരും വന്ദനയിൽനിന്ന്​ പഠിക്കണമെന്നും ഉത്തരാഖണ്ഡിൽനിന്നുള്ള താരങ്ങൾക്ക്​ പ്രചോദനമാണെന്നും മന്ത്രി കൂട്ടിച്ചേർത്തിരുന്നു.

ടോക്യോ ഒളിമ്പിക്​സിൽ മികച്ച പ്രകടനം കാഴ്ചവെച്ച വന്ദനക്ക്​ ഉത്തരാഖണ്ഡ്​ സർക്കാർ 25ലക്ഷം രൂപ വാഗ്​ദാനം ചെയ്​തിരുന്നു.