ഹാട്രിക്​ നെയ്​മർ; ബ്രസീലിനും അർജൻറീനക്കും രണ്ടാം ജയം

ലിമ: ലാറ്റിനമേരിക്കൻ ലോകകപ്പ്​ യോഗ്യത റൗണ്ട്​ പോരാട്ടങ്ങളിൽ കരുത്തരായ ബ്രസീലിനും അർജൻറീനക്കും തുടർച്ചയായ രണ്ടാം ജയം. ആദ്യമത്സരത്തിൽ അർജൻറീന 2-1ന്​ ബൊളീവിയയെ മറികടന്നപ്പോൾ പെറുവിനെ 4-2നായിരുന്നു ബ്രസീൽ പഞ്ഞിക്കിട്ടത്​. ബ്രസീലിനായി സൂപ്പർ താരം നെയ്​മർ മൂന്ന്​ വട്ടം വലകുലുക്കി.

റൊണാൾഡോയെ മറികടന്നു ഇനി നെയ്​മറിന്​ മുന്നിൽ പെലെ മാത്രം

സൂപ്പർ താരം നെയ്​മറിൻെറ ഹാട്രിക്​ മികവിലായിരുന്നു ബ്രസീലിൻെറ ജയം. ഇതോടെ ബ്രസീലിൻെറ എക്കാലത്തെയും മികച്ച ഗോൾവേട്ടക്കാരുടെ പട്ടികയിൽ ഇതിഹാസ താരം റൊണാൾഡോയെ (62) മറികടന്ന്​ രണ്ടാമതെത്താൻ 28കാരനായ നെയ്​മറിനായി (64). ഇതിഹാസം പെലെ (77) മാത്രമാണ്​ ​ഇനി നെയ്​മറിന്​ മുന്നിലുള്ളത്​.

രണ്ട്​ വട്ടം പിറകിൽ പോയ ശേഷമായിരുന്നു ബ്രസീലിൻെറ ഉഗ്രൻ തിരിച്ചുവരവ്​. ആറാം മിനിറ്റിൽ ആന്ദ്രേ കാറിലോയുടെ ഗോളിൽ പെറുവാണ്​ ആദ്യം ലീഡെടുത്തത്​. 28ാം മിനിറ്റിൽ പെനാൽറ്റിയിലൂടെ നെയ്​മർ ബ്രസീലിനെ ഒപ്പമെത്തിച്ചു. എന്നാൽ ആദ്യ പകുതി അവസാനിച്ച ശേഷം 59ാം മിനിറ്റിൽ റെനാറ്റോ ടാപിയ ആതിഥേയരെ വീണ്ടും മുന്നിലാക്കി.

റോബർ​ട്ടോ ഫിർമിനോയുടെ പാസിൽ നിന്നും വലചലിപ്പിച്ച്​ റിചാർലിസണാണ്​ കാനറികൾക്ക്​ വീണ്ടും സമനില സമ്മാനിച്ചത്​. ശേഷം 83ാം മിനിറ്റിൽ തന്നെ വീഴ്​ത്തിയതിന്​ ലഭിച്ച പെനാൽറ്റി ലക്ഷ്യത്തിലെത്തിച്ച നെയ്​മർ ബ്രസീലിനെ ​ഡ്രൈവിങ്​ സീറ്റിലാക്കി. ഇതിനിടെ കാർലോസ്​ സാംബ്രാനോ ചുവപ്പ്​ കാർഡ്​ കണ്ട്​ മടങ്ങിയതിനാൽ പെറു പത്തുപേരായി ചുരുങ്ങിയിരുന്നു.

ഇഞ്ച്വറി സമയത്ത്​ പോസ്​റ്റിൽ തട്ടി മടങ്ങിയ എവർട്ടൻെറ ഷോട്ട്​ വലയിലേക്ക്​ തട്ടിയിട്ട്​ നെയ്​മർ ഹാട്രിക്​​ തികച്ചു​. അവസാന നിമിഷം പെറുവിൻെറ കളിക്കാരനായ കാർലോസ്​ കസാഡ കുടി ചുവപ്പ്​ വാങ്ങി.

ആദ്യ മത്സരത്തിൽ ബൊളീവിയയെ 5-0ത്തിന്​ തകർത്ത ബ്രസീൽ ഇതോടെ രണ്ട്​ ജയവുമായി പട്ടികയിൽ ഒന്നാമൻമാരായി. ഹാട്രിക്കിനൊപ്പം റിചാർലിസണിൻെറ ഗോളിനാധാരമായ കോർണർ കിക്കെടുക്കുകയും ചെയ്​ത നെയ്​മർ കളിയിലെ താരമായി. മത്സരത്തിൽ മികച്ച ജയം നേടിയെങ്കിലും ബ്രസീലിൻെറ പ്രതിരോധത്തിലെ പാളിച്ചകൾ ചോദ്യചിഹ്നമായി അവശേഷിക്കുന്നുണ്ട്​.

ദുഷ്​പേര് മായ്​ച്ച്​ മെസ്സിയും പിള്ളേരും

15 കൊല്ലത്തിനിടെ ബൊളീവിയയിലെ ലാപാസ്​ മൈതാനത്തിൽ ജയിച്ചിട്ടില്ലെന്ന ദുഷ്​പേര്​ മായ്​ച്ചുകളയുകയായിരുന്നു ലയണൽ മെസ്സിയും പിള്ളേരും. സമുദ്രനിരപ്പിൽ നിന്നും 3650 മീറ്റർ മുകളിൽ നടന്ന മത്സരത്തിൽ ബൊളീവിയക്കെതിരെ പിറകിൽ നിന്ന ശേഷം 2-1നായിരുന്നു അർജൻറീനയുടെ വിജയം. പകരക്കാരനായി ഇറങ്ങിയ ജോക്വിൻ കൊറിയയാണ്​ അർജൻറീനക്കായി വിജയഗോൾ നേടിയത്​.

മത്സരം തുടങ്ങി 24ാം മിനിറ്റിൽ തന്നെ സ്വന്തം മൈതാനത്തിൽ മാഴ്​സലോ മൊറീനോ ബൊളീവിയയെ മുന്നിലെത്തിച്ചിരുന്നു. ആദ്യപകുതി അവസാനിക്കുന്നതിന്​ തൊട്ടുമുമ്പ്​ ബൊളീവിയൻ പ്രതിരോധ ഭടൻ ജോസ്​ കരാസ്​കോ ക്ലിയർ ചെയ്യാൻ ശ്രമിച്ച പന്ത്​ ലോതരോ മാർടിനസിൻെറ കാലിൽ തട്ടി വലയിലായതോടെ അർജൻറീന ഒപ്പമെത്തി. ലയണൽ മെസ്സിയല്ലാതെ 2016 നവംബറിന്​ ശേഷം ലോകകപ്പ്​ യോഗ്യത റൗണ്ടിൽ അർജൻറീനക്കായി ​ഗോൾ നേടുന്ന രണ്ടാമത്തെ താരമാണ്​ മാർടിനസ്​.

59ാം മിനിറ്റിൽ ലൂകാസ്​ ഒകാംപസിൻെറ പകരക്കാരനായാണ്​ കൊറിയ കളത്തിലിറങ്ങിയത്​. മത്സരം തീരാൻ 11 മിനിറ്റ്​ ശേഷിക്കെ​ മാർടിനസിൻെറ പാസിൽ നിന്നും കൊറിയ ടീമിന്​ ചരി​ത്ര ജയം സമ്മാനിച്ചത്​. കഴിഞ്ഞ വെള്ളിയാഴ്​ച നടന്ന മത്സരത്തിൽ ലയണൽ മെസ്സിയുടെ പെനാൽറ്റി ഗോളിൻെറ മികവിൽ അർജൻറീന ഇക്വഡോറിനെ 1-0ത്തിന്​ തോൽപിച്ചിരുന്നു.

മറ്റ്​ മത്സരങ്ങളിൽ ഇക്വഡോർ 4-2ന്​ യുറുഗ്വായ്​യെയും പാരഗ്വായ്​ 1-0ത്തിന്​ വെനിസ്വേലയെയും തോൽപിച്ചു. ചിലിയും കൊളംബിയയും രണ്ട്​ ഗോൾ വീതമടിച്ച്​ സമനിലയിൽ പിരിഞ്ഞു.