'ബ്രസീലില്ലാത്ത ടൂർണമെന്‍റുകളിൽ മെസ്സിക്കായി ആർപ്പുവിളിച്ചിട്ടുണ്ട്'; പ്രിയസുഹൃത്തിനോടുള്ള ഇഷ്ടം പങ്കുവെച്ച്​​ നെയ്മർ

ബ്രസീലിയ: സമകാലീന ഫുട്​ബാളിലെ രണ്ട്​ സൂപ്പർ താരങ്ങളാണ്​ അർജന്‍റീനയുടെ ലയണൽ മെസ്സിയും ബ്രസീലിന്‍റെ നെയ്​മറും. ബാഴ്​സലോണയിൽ മുമ്പ്​ ഒരുമിച്ച്​ പന്ത്​ തട്ടിയ ഇരുവരും നല്ല സുഹൃത്തുക്കളാണെന്നത്​ ഏവർക്കുമറിയാം. കോപ്പ അമേരിക്ക ഫുട്​ബാൾ ടൂർണമെന്‍റിന്‍റെ ഫൈനലിൽ തന്‍റെ രാജ്യം അർജന്‍റീനയെ നേരിടാനൊരുങ്ങുന്നതിന്​ തൊട്ടുമുമ്പ്​ സുപ്രധാനമായ ഒരു വെളിപ്പെടുത്തൽ നടത്തിയിരിക്കുകയാണ്​ നെയ്​മർ. മെസ്സിയെ ലോകത്തിലെ ഏറ്റവും മികച്ച കളിക്കാരനെന്ന്​ വിശേഷിപ്പിച്ച നെയ്​മർ ബ്രസീൽ കളിക്കാത്ത ടൂർണമെന്‍റിൽ താൻ മെസ്സിയുടെ അർജന്‍റീന​ ജയിക്കാനായിട്ടാണ്​ ആഗ്രഹിക്കുന്നതെന്ന്​ മാധ്യമപ്രവർത്തകരോട്​ വ്യക്തമാക്കി.

'എപ്പോഴും പറയുംപോലെ ഞാൻ കണ്ടതിൽ വെച്ച്​ ഏറ്റവും മികച്ച കളിക്കാരനാണയാൾ. എന്‍റെ നല്ല സുഹൃത്ത്​ കൂടിയാണ്​. എന്നാൽ ഞങ്ങളിപ്പോൾ ഫൈനലിലാണ്​. ഞങ്ങൾ എതിരാളികൾ കൂടിയാണ്​. എനിക്ക്​ ഈ കിരീടം ലഭിച്ചേ മതിയാകൂ. ഇത്​ എന്‍റെ ആദ്യ കോപ അമേരിക്ക കിരീടമാകും ഇത്​. വർഷങ്ങളായി ബ്രസീലില്ലാത്ത ടൂർണമെന്‍റുകളിൽ ഞാൻ മെസ്സിക്കായി ആർപ്പുവിളിച്ചിട്ടുണ്ട്​. 2014 ലോകകപ്പ്​ ഫൈനൽ ജർമനിയെ നേരിട്ടപ്പോൾ ഞാൻ അർജന്‍റീനയുടെ വിജയമായിരുന്നു ആഗ്രഹിച്ചത്' -നെയ്​മർ പറഞ്ഞു.

'നമ്മൾ ഒരാളുമായി ചങ്ങാത്തത്തിലായാൽ അത്​ മറക്കുക ഭയങ്കര പ്രയാസപ്പെട്ട കാര്യമാണ്​. നമ്മൾ സുഹൃത്തിനോടൊത്ത്​ ഒരു വിഡിയോ ഗെയിം കളിക്കു​േമ്പാൾ അവനെ തോൽപിക്കാൻ നോക്കുമെല്ലോ... അതേ കാര്യമാണ്​ എല്ലാ ബ്രസീലുകാരനും ശനിയാഴ്ച ചെയ്യുക'-നെയ്​മർ കൂട്ടിച്ചേർത്തു.

വൻകര കാത്തിരുന്ന ഫൈനലിനാണ്​ മറക്കാന സ്​റ്റേഡിയം സാക്ഷ്യം വഹിക്കാൻ പോകുന്നത്​. ഫൈനലിൽ എതിരാളികളായി അർജന്‍റീനയെ ലഭിക്കണമെന്നും പക്ഷേ വിജയം ബ്രസീലിനായിരിക്കുമെന്നതിൽ സംശയമൊന്നു​മി​ല്ലെന്നും നെയ്​മർ പറഞ്ഞതോടെ രണ്ടാം സെമിഫൈനൽ ഏവരും ഉറ്റുനോക്കിയിരുന്നു. കൊളംബിയക്കെതിരായ സെമിവിജയത്തിന്​ ശേഷം നെയ്​മറിന്​ മെസ്സി മറുപടിയും നൽകി. 'നല്ല കുട്ടിയായത്​ കൊണ്ടാണ്​ അവൻ അങ്ങനെ പറഞ്ഞത്​. എന്നാൽ ഇത്​ ഫൈനലാണ്​, നാമെല്ലാം ജയിക്കണമെന്നല്ലേ ആഗ്രഹിക്കുന്നത്​' -മെസ്സി പറഞ്ഞു.

'ഞങ്ങൾ രണ്ടുപേരും ഫൈനലിലെത്തി. നാമെല്ലാവരും പ്രതീക്ഷിക്കുന്ന പോലൊരു ഫൈനലാകും അത്​. തീർച്ചയായും കടുത്ത മത്സരമായിരിക്കും. ഞങ്ങൾ ആദ്യ ലക്ഷ്യം നേടി, എല്ലാ മത്സരങ്ങളും കളിക്കുക എന്നതായിരുന്നു അത്. ഇനി ആ ഫൈനലിൽ കൂടി വിജയിക്കാൻ ഞങ്ങൾ ശ്രമിക്കും' -മെസ്സി കൂട്ടിച്ചേർത്തു.

അർജന്‍റീനയും കൊളംബിയയും തമ്മിലുള്ള രണ്ടാം സെമി ഫൈനലിന്​ മുന്നോടിയായിട്ടായിരുന്നു​ നെയ്​മറിന്‍റെ സൗഹൃദത്തിൽ ചാലിച്ച വെല്ലുവിളി. 'എനിക്ക് ഫൈനലിൽ​ അർജന്‍റീനയെ വേണം, ഞാൻ അവരോടൊപ്പമാണ്​. എനിക്ക്​ അവിടെ സുഹൃത്തുക്കളുണ്ട്​. പക്ഷേ ഫൈനൽ വിജയിക്കുന്നത്​ ബ്രസീലായിരിക്കും'- നെയ്​മർ ചിരിച്ചുകൊണ്ട്​ പറഞ്ഞു.

2007 കോപ്പയിലാണ്​ അർജന്‍റീനയും ബ്രസീലും അവസാനമായി ഫൈനലിൽ ഏറ്റുമുട്ടിയത്​. അന്ന്​ എതിരില്ലാത്ത മൂന്നുഗോളുകൾക്ക്​ ബ്രസീൽ വിജയിച്ചിരുന്നു. കഴിഞ്ഞ കോപ്പയിൽ സെമിഫൈനലിൽ ഇരുടീമുകളും ഏറ്റുമുട്ടിയപ്പോൾ എതിരില്ലാത്ത രണ്ടുഗോളുകൾക്ക്​ ജയം ബ്രസീലിനൊപ്പമായിരുന്നു.